₂Γνωστὸς ἐν τῇ Ιουδαίᾳ ὁ θεός,

ἐν τῷ Ισραηλ μέγα τὸ ὄνομα αὐτοῦ.

₃καὶ ἐγενήθη ἐν εἰρήνῃ ὁ τόπος αὐτοῦ

καὶ τὸ κατοικητήριον αὐτοῦ ἐν Σιων·

₄ἐκεῖ συνέτριψεν τὰ κράτη τῶν τόξων,

ὅπλον καὶ ῥομφαίαν καὶ πόλεμον.

διάψαλμα,

₅φωτίζεις σὺ θαυμαστῶς ἀπὸ ὀρέων αἰωνίων.

₆ἐταράχθησαν πάντες οἱ ἀσύνετοι τῇ καρδίᾳ,

ὕπνωσαν ὕπνον αὐτῶν καὶ οὐχ εὗρον οὐδὲν

πάντες οἱ ἄνδρες τοῦ πλούτου ταῖς χερσὶν αὐτῶν.

₇ἀπὸ ἐπιτιμήσεώς σου, ὁ θεὸς Ιακωβ,

ἐνύσταξαν οἱ ἐπιβεβηκότες τοὺς ἵππους.

₈σὺ φοβερὸς εἶ, καὶ τίς ἀντιστήσεταί σοι;

ἀπὸ τότε ἡ ὀργή σου.

₉ἐκ τοῦ οὐρανοῦ ἠκούτισας κρίσιν,

γῆ ἐφοβήθη καὶ ἡσύχασεν

₁₀ἐν τῷ ἀναστῆναι εἰς κρίσιν τὸν θεὸν

τοῦ σῶσαι πάντας τοὺς πραεῖς τῆς γῆς.

διάψαλμα.

₁₁ὅτι ἐνθύμιον ἀνθρώπου ἐξομολογήσεταί σοι,

καὶ ἐγκατάλειμμα ἐνθυμίου ἑορτάσει σοι.

₁₂εὔξασθε καὶ ἀπόδοτε κυρίῳ τῷ θεῷ ὑμῶν·

πάντες οἱ κύκλῳ αὐτοῦ οἴσουσιν δῶρα

₁₃τῷ φοβερῷ καὶ ἀφαιρουμένῳ πνεύματα ἀρχόντων,

φοβερῷ παρὰ τοῖς βασιλεῦσι τῆς γῆς.