₁In mense octavo in anno secundo Darii

factum est verbum Domini ad Zacchariam filium Barachiae filium

Addo prophetam dicens

₂iratus est Dominus super patres vestros iracundia

₃et dices ad eos haec dicit Dominus exercituum

convertimini ad me ait Dominus exercituum

et convertar ad vos dicit Dominus exercituum

₄ne sitis sicut patres vestri

ad quos clamabant prophetae priores dicentes

haec dicit Dominus exercituum convertimini de viis vestris malis

et cogitationibus vestris pessimis

et non audierunt neque adtenderunt ad me dicit Dominus

₅patres vestri ubi sunt et prophetae

numquid in sempiternum vivent

₆verumtamen verba mea et legitima mea

quae mandavi servis meis prophetis

numquid non conprehenderunt patres vestros

et conversi sunt et dixerunt

sicut cogitavit Dominus exercituum facere nobis

secundum vias nostras et secundum adinventiones nostras fecit nobis

₇in die vicesima et quarta undecimo mense

sabath

in anno secundo Darii

factum est verbum Domini ad Zacchariam filium Barachiae filium Addo prophetam dicens

₈vidi per noctem et ecce vir ascendens super equum rufum

et ipse stabat inter myrteta quae erant in profundo

et post eum equi rufi varii et albi

₉et dixi quid sunt isti domine mi

et dixit ad me angelus qui loquebatur in me

ego ostendam tibi quid sint haec

₁₀et respondit vir qui stabat inter myrteta et dixit

isti sunt quos misit Dominus ut perambularent terram

₁₁et responderunt angelo Domini qui stabat inter myrteta et dixerunt

perambulavimus terram et ecce omnis terra habitatur et quiescit

₁₂et respondit angelus Domini et dixit

Domine exercituum usquequo tu non misereberis Hierusalem

et urbium Iuda quibus iratus es

iste septuagesimus annus est

₁₃et respondit Dominus angelo qui loquebatur in me verba bona verba

consolatoria

₁₄et dixit ad me angelus qui loquebatur in me

clama dicens haec dicit Dominus exercituum

zelatus sum Hierusalem et Sion zelo magno

₁₅et ira magna ego irascor super gentes opulentas

quia ego iratus sum parum ipsi vero adiuverunt in malum

₁₆propterea haec dicit Dominus

revertar ad Hierusalem in misericordiis

domus mea aedificabitur in ea ait Dominus exercituum

et perpendiculum extendetur super Hierusalem

₁₇adhuc clama dicens haec dicit Dominus exercituum

adhuc affluent civitates meae bonis

et consolabitur Dominus adhuc Sion

et eliget adhuc Hierusalem

₁₈et levavi oculos meos et vidi et ecce quattuor cornua

₁₉et dixi ad angelum qui loquebatur in me quid sunt haec

et dixit ad me

haec sunt cornua quae ventilaverunt Iudam et Israhel et Hierusalem

₂₀et ostendit mihi Dominus quattuor fabros

₂₁et dixi quid isti veniunt facere

qui ait dicens haec sunt cornua

quae ventilaverunt Iudam per singulos viros

et nemo eorum levavit caput suum

et venerunt isti deterrere ea

ut deiciant cornua gentium quae levaverunt cornu super terram Iuda

ut dispergerent eam