AD TIMOTHEUM I 6

₁quicumque sunt sub iugo servi

dominos suos omni honore dignos arbitrentur

ne nomen Domini et doctrina blasphemetur

₂qui autem fideles habent dominos

non contemnant quia fratres sunt

sed magis serviant quia fideles sunt et dilecti

qui beneficii participes sunt

haec doce et exhortare

₃si quis aliter docet

et non adquiescit sanis sermonibus Domini nostri Iesu Christi

et ei quae secundum pietatem est doctrinae

₄superbus nihil sciens

sed languens circa quaestiones et pugnas verborum

ex quibus oriuntur invidiae contentiones

blasphemiae suspiciones malae

₅conflictationes hominum mente corruptorum

et qui veritate privati sunt

existimantium quaestum esse pietatem

₆est autem quaestus magnus pietas cum sufficientia

₇nihil enim intulimus in mundum

haut dubium quia nec

auferre quid possumus

₈habentes autem alimenta et quibus tegamur

his contenti sumus

₉nam qui volunt divites fieri

incidunt in temptationem et laqueum

et desideria multa inutilia et nociva

quae mergunt homines in interitum et perditionem

₁₀radix enim omnium malorum est cupiditas

quam quidam appetentes erraverunt a fide

et inseruerunt se doloribus multis

₁₁tu autem o homo Dei haec fuge

sectare vero iustitiam pietatem fidem

caritatem patientiam mansuetudinem

₁₂certa bonum certamen fidei

adprehende vitam aeternam in qua vocatus es

et confessus bonam confessionem coram multis testibus

₁₃praecipio tibi coram Deo qui vivificat omnia et Christo Iesu

qui testimonium reddidit sub Pontio Pilato bonam confessionem

₁₄ut serves mandatum sine macula inreprehensibile

usque in adventum Domini nostri Iesu Christi

₁₅quem suis temporibus ostendet beatus et solus potens

rex regum et Dominus dominantium

₁₆qui solus habet inmortalitatem

lucem habitans

inaccessibilem

quem vidit nullus hominum sed nec videre potest

cui honor et imperium sempiternum amen

₁₇divitibus huius saeculi praecipe non sublime sapere

neque sperare in incerto divitiarum

sed in Deo

qui praestat nobis omnia abunde ad fruendum

₁₈bene agere divites fieri in operibus bonis

facile tribuere communicare

₁₉thesaurizare sibi fundamentum bonum in futurum

ut adprehendant veram vitam

₂₀o Timothee depositum custodi

devitans profanas vocum novitates

et oppositiones falsi nominis scientiae

₂₁quam quidam promittentes circa fidem exciderunt

gratia tecum