AD TIMOTHEUM I 5

₁seniorem ne increpaveris sed obsecra ut patrem iuvenes ut fratres

₂anus ut matres iuvenculas ut sorores in omni castitate

₃viduas honora quae vere viduae sunt

₄si qua autem vidua filios aut nepotes habet

discant primum domum suam regere

et mutuam vicem reddere parentibus

hoc enim acceptum est coram Deo

₅quae autem vere vidua est et desolata

speravit in Deum

et instat obsecrationibus et orationibus nocte ac die

₆nam quae in deliciis est vivens mortua est

₇et hoc praecipe ut inreprehensibiles sint

₈si quis autem suorum et maxime domesticorum curam non habet

fidem negavit et est infideli deterior

₉vidua eligatur non minus sexaginta annorum

quae fuerit unius viri uxor

₁₀in operibus bonis testimonium habens

si filios educavit si hospitio recepit si sanctorum pedes lavit

si tribulationem patientibus subministravit

si omne opus bonum subsecuta est

₁₁adulescentiores autem viduas devita

cum enim luxuriatae fuerint in Christo nubere volunt

₁₂habentes damnationem quia primam fidem irritam fecerunt

₁₃simul autem et otiosae discunt circumire domos

non solum otiosae sed et verbosae et curiosae

loquentes quae non oportet

₁₄volo ergo iuveniores nubere

filios procreare matres familias esse

nullam occasionem dare adversario maledicti gratia

₁₅iam enim quaedam conversae sunt retro Satanan

₁₆si qua fidelis habet viduas

subministret illis et non gravetur ecclesia

ut his quae vere viduae sunt sufficiat

₁₇qui bene praesunt presbyteri duplici honore digni habeantur

maxime qui laborant in verbo et doctrina

₁₈dicit enim scriptura

non infrenabis os bovi trituranti

et dignus operarius mercede sua

₁₉adversus presbyterum accusationem noli recipere

nisi sub duobus et tribus testibus

₂₀peccantes coram omnibus argue

ut et ceteri timorem habeant

₂₁testor coram Deo et Christo Iesu et electis angelis

ut haec custodias sine praeiudicio

nihil faciens in aliam partem declinando

₂₂manus cito nemini inposueris

neque communicaveris peccatis alienis

te ipsum castum custodi

₂₃noli adhuc aquam bibere sed vino modico utere

propter stomachum tuum et frequentes tuas infirmitates

₂₄quorundam hominum peccata manifesta sunt

praecedentia ad iudicium

quosdam autem et subsequuntur

₂₅similiter et facta bona manifesta sunt

et quae aliter se habent abscondi non possunt