ACTUS APOSTOLORUM 10

₁vir autem quidam erat in Caesarea nomine Cornelius

centurio cohortis quae dicitur Italica

₂religiosus et timens Deum cum omni domo sua

faciens elemosynas multas plebi

et deprecans Deum semper

₃vidit in visu manifeste

quasi hora nona diei

angelum Dei introeuntem ad se et dicentem sibi Corneli

₄at ille intuens eum timore correptus dixit

quid est domine

dixit autem illi

orationes tuae et elemosynae tuae ascenderunt in memoriam in

conspectu Dei

₅et nunc mitte viros in Ioppen

et accersi Simonem quendam qui cognominatur Petrus

₆hic hospitatur apud Simonem quendam coriarium

cuius est domus iuxta mare

₇et cum discessisset angelus qui loquebatur illi

vocavit duos domesticos suos et militem metuentem Dominum

ex his qui illi parebant

₈quibus cum narrasset omnia misit illos in Ioppen

₉postera autem die iter illis facientibus

et adpropinquantibus civitati

ascendit Petrus in superiora ut oraret circa horam sextam

₁₀et cum esuriret voluit gustare

parantibus autem eis cecidit super eum mentis excessus

₁₁et videt caelum apertum

et descendens vas quoddam velut linteum magnum

quattuor initiis submitti de caelo in terram

₁₂in quo erant omnia quadrupedia et serpentia terrae et volatilia caeli

₁₃et facta est vox ad eum

surge Petre et occide et manduca

₁₄ait autem Petrus absit Domine

quia numquam manducavi omne commune et inmundum

₁₅et vox iterum secundo ad eum

quae Deus purificavit ne tu commune dixeris

₁₆hoc autem factum est per ter

et statim receptum est vas in caelum

₁₇et dum intra se haesitaret Petrus

quidnam esset visio quam vidisset

ecce viri qui missi erant a Cornelio

inquirentes domum Simonis adstiterunt ad ianuam

₁₈et cum vocassent interrogabant

si Simon qui cognominatur Petrus illic haberet hospitium

₁₉Petro autem cogitante de visione dixit Spiritus ei

ecce viri tres quaerunt te

₂₀surge itaque et descende et vade cum eis

nihil dubitans quia ego misi illos

₂₁descendens autem Petrus ad viros dixit

ecce ego sum quem quaeritis

quae causa est propter quam venistis

₂₂qui dixerunt

Cornelius centurio vir iustus et timens Deum

et testimonium habens ab universa gente Iudaeorum

responsum accepit ab angelo sancto

accersire te in domum suam et audire verba abs te

₂₃introducens igitur eos recepit hospitio

sequenti autem die surgens profectus est cum eis

et quidam ex fratribus ab Ioppe comitati sunt eum

₂₄altera autem die introivit Caesaream

Cornelius vero expectabat illos

convocatis cognatis suis et necessariis amicis

₂₅et factum est cum introisset Petrus

obvius ei Cornelius

et procidens ad pedes adoravit

₂₆Petrus vero levavit eum dicens

surge et ego ipse homo sum

₂₇et loquens cum illo intravit et invenit multos qui convenerant

₂₈dixitque ad illos

vos scitis quomodo abominatum sit viro iudaeo

coniungi aut accedere ad alienigenam

et mihi ostendit Deus

neminem communem aut inmundum dicere hominem

₂₉propter quod sine dubitatione veni accersitus

interrogo ergo quam ob causam accersistis me

₃₀et Cornelius ait

a nudius quartana die usque in hanc horam

orans eram hora nona in domo mea

et ecce vir stetit ante me in veste candida et ait

₃₁Corneli exaudita est oratio tua

et elemosynae tuae commemoratae sunt in conspectu Dei

₃₂mitte ergo in Ioppen

et accersi Simonem qui cognominatur Petrus

hic hospitatur in domo Simonis coriarii iuxta mare

₃₃confestim igitur misi ad te et tu bene fecisti veniendo

nunc ergo omnes nos in conspectu tuo adsumus

audire omnia quaecumque tibi praecepta sunt a Domino

₃₄aperiens autem Petrus os dixit in veritate conperi

quoniam non est personarum acceptor Deus

₃₅sed in omni gente qui timet eum et operatur iustitiam

acceptus est illi

₃₆verbum misit filiis Israhel

adnuntians pacem per Iesum Christum

hic est omnium Dominus

₃₇vos scitis quod factum est verbum per universam Iudaeam

incipiens enim a Galilaea post baptismum quod praedicavit Iohannes

₃₈Iesum a Nazareth

quomodo unxit eum Deus Spiritu Sancto et virtute

qui pertransivit benefaciendo

et sanando omnes oppressos a diabolo

quoniam Deus erat cum illo

₃₉et nos testes sumus omnium

quae fecit in regione Iudaeorum et Hierusalem

quem et occiderunt suspendentes in ligno

₄₀hunc Deus suscitavit tertia die et dedit eum manifestum fieri

₄₁non omni populo sed testibus praeordinatis a Deo

nobis qui manducavimus et bibimus cum illo

postquam resurrexit a mortuis

₄₂et praecepit nobis praedicare populo et testificari

quia ipse est qui constitutus est a Deo iudex vivorum et mortuorum

₄₃huic omnes prophetae testimonium perhibent

remissionem peccatorum accipere per nomen eius

omnes qui credunt in eum

₄₄adhuc loquente Petro verba haec

cecidit Spiritus Sanctus super omnes qui audiebant verbum

₄₅et obstipuerunt ex circumcisione fideles

qui venerant cum Petro

quia et in nationes gratia Spiritus Sancti effusa est

₄₆audiebant enim illos loquentes linguis et magnificantes Deum

₄₇tunc respondit Petrus numquid aquam quis prohibere potest

ut non baptizentur hii qui Spiritum Sanctum acceperunt sicut et nos

₄₈et iussit eos in nomine Iesu Christi baptizari

tunc rogaverunt eum

ut maneret aliquot diebus