ACTUS APOSTOLORUM 9

₁Saulus autem adhuc inspirans minarum et caedis in discipulos Domini

accessit ad principem sacerdotum

₂et petiit ab eo epistulas in Damascum ad

synagogas

ut si quos invenisset huius viae viros ac mulieres

vinctos perduceret in Hierusalem

₃et cum iter faceret contigit ut adpropinquaret Damasco

et subito circumfulsit eum lux de caelo

₄et cadens in terram audivit vocem dicentem sibi

Saule Saule quid me persequeris

₅qui dixit quis es Domine

et ille ego sum Iesus quem tu persequeris

₇sed surge et ingredere civitatem

et dicetur tibi quid te oporteat facere

viri autem illi qui comitabantur cum eo stabant stupefacti

audientes quidem vocem neminem autem videntes

₈surrexit autem Saulus de terra apertisque oculis nihil videbat

ad manus autem illum trahentes introduxerunt Damascum

₉et erat tribus diebus non videns

et non manducavit neque bibit

₁₀erat autem quidam discipulus Damasci nomine Ananias

et dixit ad illum in visu Dominus Anania

at ille ait ecce ego Domine

₁₁et Dominus ad illum

surgens vade in vicum qui vocatur Rectus

et quaere in domo Iudae Saulum nomine Tarsensem

ecce enim orat

₁₂et vidit virum Ananiam nomine introeuntem

et inponentem sibi manus ut visum recipiat

₁₃respondit autem Ananias Domine audivi a multis de viro hoc

quanta mala sanctis tuis fecerit in Hierusalem

₁₄et hic habet potestatem a principibus sacerdotum alligandi omnes

qui invocant nomen tuum

₁₅dixit autem ad eum Dominus

vade quoniam vas electionis est mihi iste

ut portet nomen meum coram gentibus et regibus et filiis Israhel

₁₆ego enim ostendam illi

quanta oporteat eum pro nomine meo pati

₁₇et abiit Ananias et introivit in domum

et inponens ei manus dixit Saule frater

Dominus misit me Iesus

qui apparuit tibi in via qua veniebas

ut videas et implearis Spiritu Sancto

₁₈et confestim ceciderunt ab oculis eius tamquam squamae

et visum recepit et surgens baptizatus est

₁₉et cum accepisset cibum confortatus est

fuit autem cum discipulis qui erant Damasci per dies aliquot

₂₀et continuo in synagogis praedicabat Iesum

quoniam hic est Filius Dei

₂₁stupebant autem omnes qui audiebant et dicebant

nonne hic est qui expugnabat in Hierusalem

eos qui invocabant nomen istud

et huc ad hoc venit

ut vinctos illos duceret ad principes

sacerdotum

₂₂Saulus autem magis convalescebat

et confundebat Iudaeos qui habitabant Damasci

adfirmans quoniam hic est Christus

₂₃cum implerentur autem dies multi

consilium fecerunt Iudaei ut eum interficerent

₂₄notae autem factae sunt Saulo insidiae eorum

custodiebant autem et portas die ac nocte ut eum interficerent

₂₅accipientes autem discipuli eius

nocte per murum dimiserunt eum submittentes in sporta

₂₆cum autem venisset in Hierusalem

temptabat iungere se discipulis

et omnes timebant eum

non credentes quia esset discipulus

₂₇Barnabas autem adprehensum illum duxit ad apostolos

et narravit illis quomodo in via vidisset Dominum

et quia locutus est ei

et quomodo in Damasco fiducialiter egerit in

nomine Iesu

₂₈et erat cum illis intrans et exiens in Hierusalem

et fiducialiter agens in nomine Domini

₂₉loquebatur quoque et disputabat cum Graecis

illi autem quaerebant occidere eum

₃₀quod cum cognovissent fratres

deduxerunt eum Caesaream et dimiserunt Tarsum

₃₁ecclesia quidem per totam Iudaeam et Galilaeam et Samariam habebat pacem

et aedificabatur ambulans in timore Domini

et consolatione Sancti Spiritus replebatur

₃₂factum est autem Petrum dum pertransiret

universos devenire

et ad sanctos qui habitabant Lyddae

₃₃invenit autem ibi hominem quendam nomine Aeneam

ab annis octo iacentem in grabatto qui erat paralyticus

₃₄et ait illi Petrus

Aeneas sanat te Iesus Christus

surge et sterne tibi

et continuo surrexit

₃₅et viderunt illum omnes

qui habitabant Lyddae et Saronae

qui conversi sunt ad Dominum

₃₆in Ioppe autem fuit quaedam discipula nomine Tabitas

quae interpretata dicitur Dorcas

haec erat plena operibus bonis et elemosynis quas faciebat

₃₇factum est autem in diebus illis ut infirmata moreretur

quam cum lavissent posuerunt eam in cenaculo

₃₈cum autem prope esset Lydda ab Ioppe

discipuli audientes quia Petrus esset in ea

miserunt duos viros ad eum rogantes

ne pigriteris venire usque ad nos

₃₉exsurgens autem Petrus venit cum illis

et cum advenisset duxerunt illum in cenaculum

et circumsteterunt illum omnes viduae flentes

et ostendentes tunicas et vestes quas faciebat illis Dorcas

₄₀eiectis autem omnibus foras Petrus ponens genua oravit

et conversus ad corpus dixit Tabita surge

at illa aperuit oculos suos et viso Petro resedit

₄₁dans autem illi manum erexit eam

et cum vocasset sanctos et viduas adsignavit eam vivam

₄₂notum autem factum est per universam Ioppen

et crediderunt multi in Domino

₄₃factum est autem ut dies multos moraretur in Ioppe

apud quendam Simonem coriarium