ACTUS APOSTOLORUM 12

₁eodem autem tempore misit Herodes rex manus

ut adfligeret quosdam de ecclesia

₂occidit autem Iacobum fratrem Iohannis gladio

₃videns autem quia placeret Iudaeis

adposuit adprehendere et Petrum

erant autem dies azymorum

₄quem cum adprehendisset misit in carcerem

tradens quattuor quaternionibus militum

custodire eum

volens post pascha producere eum populo

₅et Petrus quidem servabatur in carcere

oratio autem fiebat sine intermissione ab ecclesia ad Deum pro eo

₆cum autem producturus eum esset Herodes

in ipsa nocte erat Petrus dormiens inter duos milites

vinctus catenis duabus

et custodes ante ostium custodiebant carcerem

₇et ecce angelus Domini adstitit et lumen refulsit in habitaculo

percussoque latere Petri suscitavit eum dicens

surge velociter

et ceciderunt catenae de manibus eius

₈dixit autem angelus ad eum

praecingere et calcia te gallicas tuas

et fecit sic

et dixit illi circumda tibi vestimentum tuum et sequere me

₉et exiens sequebatur

et nesciebat quia verum est quod fiebat per angelum

aestimabat autem se visum videre

₁₀transeuntes autem primam et secundam custodiam

venerunt ad portam ferream quae ducit ad civitatem

quae ultro aperta est eis

et exeuntes processerunt vicum unum

et continuo discessit angelus ab eo

₁₁et Petrus ad se reversus dixit

nunc scio vere quia misit Dominus angelum suum

et eripuit me de manu Herodis

et de omni expectatione plebis Iudaeorum

₁₂consideransque venit ad domum Mariae matris Iohannis

qui cognominatus est Marcus

ubi erant multi congregati et orantes

₁₃pulsante autem eo ostium ianuae

processit puella ad audiendum nomine Rhode

₁₄et ut cognovit vocem Petri prae gaudio non aperuit ianuam

sed intro currens nuntiavit stare Petrum ante ianuam

₁₅at illi dixerunt ad eam insanis

illa autem adfirmabat sic se habere

illi autem dicebant angelus eius est

₁₆Petrus autem perseverabat pulsans

cum autem aperuissent viderunt eum et obstipuerunt

₁₇annuens autem eis manu ut tacerent

enarravit quomodo Dominus

eduxisset eum de carcere

dixitque nuntiate Iacobo et fratribus haec

et egressus abiit in alium locum

₁₈facta autem die erat non parva turbatio inter milites

quidnam de Petro factum esset

₁₉Herodes autem cum requisisset eum et non invenisset

inquisitione facta de custodibus iussit eos duci

descendensque a Iudaea in Caesaream ibi commoratus est

₂₀erat autem iratus Tyriis et Sidoniis

at illi unianimes venerunt ad eum

et persuaso Blasto qui erat super cubiculum regis

postulabant pacem eo quod alerentur regiones eorum ab illo

₂₁statuto autem die

Herodes vestitus veste regia

sedit pro tribunali et contionabatur ad eos

₂₂populus autem adclamabat

dei voces et non hominis

₂₃confestim autem percussit eum angelus Domini

eo quod non dedisset honorem Deo

et consumptus a vermibus exspiravit

₂₄verbum autem Domini crescebat et multiplicabatur

₂₅Barnabas autem et Saulus reversi sunt ab Hierosolymis

expleto ministerio

adsumpto Iohanne qui cognominatus est Marcus