ACTUS APOSTOLORUM 13

₁erant autem in ecclesia quae erat Antiochiae prophetae et doctores

in quibus Barnabas et Symeon qui vocabatur Niger

et Lucius Cyrenensis

et Manaen qui erat Herodis tetrarchae conlactaneus et Saulus

₂ministrantibus autem illis Domino et ieiunantibus

dixit Spiritus Sanctus

separate mihi Barnaban et Saulum

in opus quod adsumpsi eos

₃tunc ieiunantes et orantes inponentesque eis manus dimiserunt illos

₄et ipsi quidem missi ab Spiritu Sancto abierunt Seleuciam

et inde navigaverunt Cyprum

₅et cum venissent Salamina

praedicabant verbum Dei in synagogis Iudaeorum

habebant autem et Iohannem in ministerio

₆et cum perambulassent universam insulam usque Paphum

invenerunt quendam virum magum

pseudoprophetam Iudaeum cui nomen erat Bariesu

₇qui erat cum proconsule Sergio Paulo viro prudente

hic accitis Barnaba et Saulo

desiderabat audire verbum Dei

₈resistebat autem illis Elymas magus

sic enim interpretatur nomen eius

quaerens avertere proconsulem a fide

₉Saulus autem qui et Paulus

repletus Spiritu Sancto intuens in eum

₁₀dixit

o plene omni dolo et omni fallacia fili diaboli

inimice omnis iustitiae

non desinis subvertere vias Domini rectas

₁₁et nunc ecce manus Domini super te et eris caecus

non videns solem usque ad tempus

et confestim cecidit in eum caligo et tenebrae

et circumiens quaerebat qui ei manum daret

₁₂tunc proconsul cum vidisset factum

credidit admirans super doctrinam Domini

₁₃et cum a Papho navigassent Paulus et qui cum eo

venerunt Pergen Pamphiliae

Iohannes autem discedens ab eis reversus est Hierosolymam

₁₄illi vero pertranseuntes Pergen

venerunt Antiochiam Pisidiae

et ingressi synagogam die sabbatorum sederunt

₁₅post lectionem autem Legis et Prophetarum

miserunt principes synagogae ad eos dicentes viri fratres

si quis est in vobis sermo exhortationis ad plebem dicite

₁₆surgens autem Paulus et manu silentium indicens ait

viri israhelitae et qui timetis Deum audite

₁₇Deus plebis Israhel elegit patres nostros et plebem exaltavit

cum essent incolae in terra Aegypti

et in brachio excelso eduxit eos ex ea

₁₈et per quadraginta annorum tempus mores eorum sustinuit in deserto

₁₉et destruens gentes septem in terra Chanaan

sorte distribuit eis terram eorum

₂₀quasi post quadringentos et quinquaginta annos

et post haec dedit iudices usque ad Samuhel prophetam

₂₁et exinde postulaverunt regem

et dedit illis Deus Saul filium Cis

virum de tribu Beniamin annis quadraginta

₂₂et amoto illo suscitavit illis David regem

cui et testimonium perhibens dixit

inveni David filium Iesse virum secundum cor meum

qui faciet omnes voluntates meas

₂₃huius Deus ex semine secundum promissionem eduxit Israhel salvatorem

Iesum

₂₄praedicante Iohanne ante faciem adventus eius

baptismum paenitentiae omni populo Israhel

₂₅cum impleret autem Iohannes cursum suum dicebat

quem me arbitramini esse non sum ego

sed ecce venit post me

cuius non sum dignus calciamenta pedum solvere

₂₆viri fratres filii generis Abraham et qui in vobis timent Deum

vobis verbum salutis huius missum est

₂₇qui enim habitabant Hierusalem et principes eius hunc ignorantes

et voces prophetarum quae per omne sabbatum leguntur

iudicantes impleverunt

₂₈et nullam causam mortis invenientes in eum

petierunt a Pilato ut interficerent eum

₂₉cumque consummassent omnia quae de eo scripta erant

deponentes eum de ligno posuerunt in monumento

₃₀Deus vero suscitavit eum a mortuis

qui visus est per dies multos

his

₃₁qui simul ascenderant cum eo de Galilaea in Hierusalem

qui usque nunc sunt testes eius ad plebem

₃₂et nos vobis adnuntiamus

ea quae ad patres nostros repromissio facta est

₃₃quoniam hanc Deus adimplevit filiis nostris resuscitans Iesum

sicut et in psalmo secundo scriptum est

Filius meus es tu ego hodie genui te

₃₄quod autem suscitaverit eum a mortuis

amplius iam non reversurum in corruptionem

ita dixit quia dabo vobis sancta David fidelia

₃₅ideoque et alias dicit

non dabis Sanctum tuum videre corruptionem

₃₆David enim sua generatione

cum administrasset voluntati Dei

dormivit et adpositus est ad patres suos et vidit corruptionem

₃₇quem vero Deus suscitavit non vidit corruptionem

₃₈notum igitur sit vobis viri fratres

quia per hunc vobis remissio peccatorum adnuntiatur

ab omnibus quibus non potuistis in lege Mosi

iustificari

₃₉in hoc omnis qui credit iustificatur

₄₀videte ergo ne superveniat quod dictum est in

prophetis

₄₁videte contemptores et admiramini et disperdimini

quia opus operor ego in diebus vestris

opus quod non credetis si quis enarraverit vobis

₄₂exeuntibus autem illis

rogabant ut sequenti sabbato loquerentur sibi verba haec

₄₃cumque dimissa esset synagoga

secuti sunt multi Iudaeorum et colentium advenarum Paulum et Barnaban

qui loquentes suadebant eis ut permanerent in gratia Dei

₄₄sequenti vero sabbato paene universa civitas convenit

audire verbum Domini

₄₅videntes autem turbas Iudaei repleti sunt zelo

et contradicebant his quae a Paulo dicebantur blasphemantes

₄₆tunc constanter Paulus et Barnabas dixerunt

vobis oportebat primum loqui verbum Dei

sed quoniam repellitis illud

et indignos vos iudicastis aeternae vitae

ecce convertimur ad gentes

₄₇sic enim praecepit nobis Dominus

posui te in lumen gentibus

ut sis in salutem usque ad extremum terrae

₄₈audientes autem gentes gavisae sunt

et glorificabant verbum Domini

et crediderunt quotquot erant praeordinati ad vitam aeternam

₄₉disseminabatur autem verbum Domini per universam regionem

₅₀Iudaei autem concitaverunt religiosas mulieres et honestas

et primos civitatis

et excitaverunt persecutionem in Paulum et Barnaban

et eiecerunt eos de finibus suis

₅₁at illi excusso pulvere pedum in eos venerunt Iconium

₅₂discipuli quoque replebantur gaudio et Spiritu Sancto