LIBER EXODI 4

₁respondens Moses ait

non credent mihi neque audient vocem meam

sed dicent non apparuit tibi Dominus

₂dixit ergo ad eum quid est hoc quod tenes in manu tua

respondit virga

₃ait proice eam in terram

proiecit et versa est in colubrum ita ut fugeret Moses

₄dixitque Dominus extende manum tuam et adprehende caudam eius

extendit et tenuit versaque est in virgam

₅ut credant inquit quod apparuerit tibi Dominus Deus patrum tuorum

Deus Abraham Deus Isaac Deus Iacob

₆dixitque Dominus rursum mitte manum in sinum tuum

quam cum misisset in sinum protulit leprosam instar nivis

₇retrahe ait manum in sinum tuum

retraxit et protulit iterum et erat similis carni reliquae

₈si non crediderint inquit tibi neque audierint sermonem signi prioris

credent verbo signi sequentis

₉quod si nec duobus quidem his signis crediderint

neque audierint vocem tuam

sume aquam fluminis et effunde eam super aridam

et quicquid hauseris de fluvio vertetur in sanguinem

₁₀ait Moses obsecro Domine non sum eloquens

ab heri et nudius tertius et ex quo locutus es ad servum tuum

inpeditioris et tardioris linguae sum

₁₁dixit Dominus ad eum

quis fecit os hominis

aut quis fabricatus est mutum et surdum videntem et caecum

nonne ego

₁₂perge igitur et ego ero in ore tuo doceboque te quid loquaris

₁₃at ille obsecro inquit Domine mitte quem missurus es

₁₄iratus Dominus in Mosen ait

Aaron frater tuus Levites scio quod eloquens sit

ecce ipse egreditur in occursum tuum

vidensque te laetabitur corde

₁₅loquere ad eum et pone verba mea in ore eius

ego ero in ore tuo et in ore illius

et ostendam vobis quid agere debeatis

₁₆ipse loquetur pro te ad populum et erit os tuum

tu autem eris ei in his quae ad Deum pertinent

₁₇virgam quoque hanc sume in manu tua

in qua facturus es signa

₁₈abiit Moses et reversus est ad Iethro cognatum suum

dixitque ei vadam et revertar ad fratres meos in Aegyptum

ut videam si adhuc vivunt

cui ait Iethro vade in pace

₁₉dixit ergo Dominus ad Mosen in Madian

vade revertere in Aegyptum

mortui sunt omnes qui quaerebant animam

tuam

₂₀tulit Moses uxorem et filios suos

et inposuit eos super asinum

reversusque est in Aegyptum portans virgam Dei in manu sua

₂₁dixitque ei Dominus revertenti in Aegyptum

vide ut omnia ostenta quae posui in manu tua facias coram Pharaone

ego indurabo cor eius et non dimittet populum

₂₂dicesque ad eum haec dicit Dominus

filius meus primogenitus meus Israhel

₂₃dixi tibi dimitte filium meum ut serviat mihi

et noluisti dimittere eum

ecce ego interficiam filium tuum primogenitum

₂₄cumque esset in itinere in diversorio

occurrit ei Dominus et volebat occidere eum

₂₅tulit ilico Seffora acutissimam petram

et circumcidit praeputium filii sui

tetigitque pedes eius et ait sponsus sanguinum tu mihi es

₂₆et dimisit eum postquam dixerat sponsus sanguinum ob circumcisionem

₂₇dixit autem Dominus ad Aaron

vade in occursum Mosi in deserto

qui perrexit ei obviam in montem Dei

et osculatus est eum

₂₈narravitque Moses Aaron omnia verba Domini

quibus miserat eum

et signa quae mandaverat

₂₉veneruntque simul

et congregaverunt cunctos seniores filiorum Israhel

₃₀locutusque est Aaron omnia verba quae dixerat Dominus ad Mosen

et fecit signa coram populo

₃₁et credidit populus

audieruntque quod visitasset Dominus filios Israhel

et quod respexisset adflictionem eorum

et proni adoraverunt