LIBER GENESIS 1

₁In principio creavit Deus caelum et terram

₂terra autem erat inanis et vacua

et tenebrae super faciem abyssi

et spiritus Dei ferebatur super aquas

₃dixitque Deus

fiat lux et facta est lux

₄et vidit Deus lucem quod esset bona

et divisit lucem ac tenebras

₅appellavitque lucem diem et tenebras noctem

factumque est vespere et mane dies unus

₆dixit quoque Deus

fiat firmamentum in medio aquarum

et dividat aquas ab aquis

₇et fecit Deus firmamentum

divisitque aquas quae erant sub firmamento ab his quae erant super firmamentum

et factum est ita

₈vocavitque Deus firmamentum caelum

et factum est vespere et mane dies secundus

₉dixit vero Deus

congregentur aquae quae sub caelo sunt in locum unum et appareat arida

factumque est ita

₁₀et vocavit Deus aridam terram

congregationesque aquarum appellavit maria

et vidit Deus quod esset bonum ₁₁et ait

germinet terra herbam virentem et facientem semen

et lignum pomiferum faciens fructum iuxta genus suum

cuius semen in semet ipso sit super terram

et factum est ita

₁₂et protulit terra herbam virentem et adferentem semen iuxta genus suum

lignumque faciens fructum

et habens unumquodque sementem secundum speciem suam

et vidit Deus quod esset bonum

₁₃factumque est vespere et mane dies tertius

₁₄dixit autem Deus

fiant luminaria in firmamento caeli

ut dividant diem ac noctem

et sint in signa et tempora et dies et annos

₁₅ut luceant in firmamento caeli et inluminent terram

et factum est ita

₁₆fecitque Deus duo magna luminaria

luminare maius ut praeesset diei

et luminare minus ut praeesset nocti et stellas

₁₇et posuit eas in firmamento caeli

ut lucerent super terram ₁₈et praeessent diei ac nocti

et dividerent lucem ac tenebras

et vidit Deus quod esset bonum

₁₉et factum est vespere et mane dies quartus

₂₀dixit etiam Deus

producant aquae reptile animae viventis

et volatile super terram sub firmamento caeli

₂₁creavitque Deus cete grandia

et omnem animam viventem atque motabilem

quam produxerant aquae in species suas

et omne volatile secundum genus suum

et vidit Deus quod esset bonum

₂₂benedixitque eis dicens

crescite et multiplicamini et replete aquas maris

avesque multiplicentur super terram

₂₃et factum est vespere et mane dies quintus

₂₄dixit quoque Deus

producat terra animam viventem in genere suo

iumenta et reptilia et bestias terrae secundum species suas

factumque est ita

₂₅et fecit Deus bestias terrae iuxta species suas

et iumenta et omne reptile terrae in genere suo

et vidit Deus quod esset bonum ₂₆et ait

faciamus hominem ad imaginem et similitudinem nostram

et praesit piscibus maris et volatilibus caeli

et bestiis universaeque terrae

omnique reptili quod movetur in terra

₂₇et creavit Deus hominem ad imaginem suam

ad imaginem Dei creavit illum

masculum et feminam creavit eos

₂₈benedixitque illis Deus et ait

crescite et multiplicamini et replete terram et subicite eam

et dominamini piscibus maris et volatilibus caeli

et universis animantibus quae moventur super terram

₂₉dixitque Deus

ecce dedi vobis omnem herbam adferentem semen super terram

et universa ligna quae habent in semet ipsis sementem generis sui

ut sint vobis in escam ₃₀et cunctis animantibus terrae

omnique volucri caeli et universis quae moventur in terra

et in quibus est anima vivens ut habeant ad vescendum

et factum est ita

₃₁viditque Deus cuncta quae fecit et erant valde bona

et factum est vespere et mane dies sextus