LIBER GENESIS 17

₁postquam vero nonaginta et novem annorum esse coeperat

apparuit ei Dominus dixitque ad eum

ego Deus omnipotens ambula coram me et esto perfectus

₂ponamque foedus meum inter me et te

et multiplicabo te vehementer nimis

₃cecidit Abram pronus in faciem

₄dixitque ei Deus

ego sum et pactum meum tecum erisque pater multarum gentium

₅nec ultra vocabitur nomen tuum Abram sed appellaberis Abraham

quia patrem multarum gentium constitui te

₆faciamque te crescere vehementissime

et ponam in gentibus regesque ex te egredientur

₇et statuam pactum meum inter me et te et inter semen tuum post te

in generationibus suis foedere sempiterno

ut sim Deus tuus et seminis tui post te

₈daboque tibi et semini tuo terram peregrinationis tuae

omnem terram Chanaan in possessionem aeternam

eroque Deus eorum

₉dixit iterum Deus ad Abraham et tu ergo custodies pactum meum

et semen tuum post te in generationibus suis

₁₀hoc est pactum quod observabitis

inter me et vos et semen tuum post te

circumcidetur ex vobis omne masculinum

₁₁et circumcidetis carnem praeputii vestri

ut sit in signum foederis inter me et vos

₁₂infans octo dierum circumcidetur in vobis

omne masculinum in generationibus vestris

tam vernaculus quam empticius circumcidetur

et quicumque non fuerit de stirpe vestra

₁₃eritque pactum meum in carne vestra in foedus aeternum

₁₄masculus cuius praeputii caro circumcisa non fuerit

delebitur anima illa de populo suo quia pactum meum irritum fecit

₁₅dixit quoque Deus ad Abraham

Sarai uxorem tuam non vocabis Sarai sed Sarram

₁₆et benedicam ei et ex illa dabo tibi filium cui benedicturus sum

eritque in nationes et reges populorum orientur ex eo

₁₇cecidit Abraham in faciem et risit dicens in corde suo

putasne centenario nascetur filius et Sarra nonagenaria pariet

₁₈dixitque ad Deum utinam Ismahel vivat coram te

₁₉et ait Deus ad Abraham

Sarra uxor tua pariet tibi filium vocabisque nomen eius Isaac

et constituam pactum meum illi in foedus sempiternum

et semini eius post eum

₂₀super Ismahel quoque exaudivi te

ecce benedicam ei et augebo et multiplicabo eum valde

duodecim duces generabit et faciam illum in gentem magnam

₂₁pactum vero meum statuam ad Isaac

quem pariet tibi Sarra tempore isto in anno altero

₂₂cumque finitus esset sermo loquentis cum eo

ascendit Deus ab Abraham

₂₃tulit autem Abraham Ismahelem filium suum

et omnes vernaculos domus suae universosque quos emerat

cunctos mares ex omnibus viris domus suae

et circumcidit carnem praeputii eorum

statim in ipsa die sicut praeceperat ei Deus

₂₄nonaginta novem erat annorum

quando circumcidit carnem praeputii sui

₂₅et Ismahel filius eius tredecim annos impleverat tempore

circumcisionis suae

₂₆eadem die circumcisus est Abraham et Ismahel filius eius

₂₇et omnes viri domus illius

tam vernaculi quam empticii et alienigenae pariter circumcisi sunt