LIBER GENESIS 25

₁Abraham vero aliam duxit uxorem nomine Cetthuram

₂quae peperit ei Zamram et Iexan et Madan et Madian et Iesboch et Sue

₃Iexan quoque genuit Saba et Dadan

filii Dadan fuerunt Assurim et Lathusim et Loommim

₄at vero ex Madian ortus est Epha et Opher et Enoch et Abida et Eldaa

omnes hii filii Cetthurae

₅deditque Abraham cuncta quae possederat Isaac

₆filiis autem concubinarum largitus est munera

et separavit eos ab Isaac filio suo

dum adhuc ipse viveret ad plagam orientalem

₇fuerunt autem dies vitae eius centum

septuaginta quinque anni

₈et deficiens mortuus est in senectute bona

provectaeque aetatis et plenus dierum

congregatusque est ad populum suum

₉et sepelierunt eum Isaac et Ismahel filii sui in spelunca duplici

quae sita est in agro Ephron filii Soor Hetthei e regione

Mambre

₁₀quem emerat a filiis Heth

ibi sepultus est ipse et Sarra uxor eius

₁₁et post obitum illius benedixit Deus Isaac filio eius

qui habitabat iuxta puteum nomine Viventis et videntis

₁₂hae sunt generationes Ismahel filii Abraham

quem peperit ei Agar Aegyptia famula Sarrae

₁₃et haec nomina filiorum eius in vocabulis et generationibus suis

primogenitus Ismahelis Nabaioth

dein Cedar et Abdeel et Mabsam

₁₄Masma quoque et Duma et Massa

₁₅Adad et Thema Itur et Naphis et Cedma

₁₆isti sunt filii Ismahel

et haec nomina per castella et oppida eorum

duodecim principes tribuum suarum

₁₇anni vitae Ismahel centum

triginta septem

deficiens mortuus est et adpositus ad

populum suum

₁₈habitavit autem ab Evila usque Sur quae respicit Aegyptum introeuntibus

Assyrios

coram cunctis fratribus suis obiit

₁₉hae quoque sunt generationes Isaac filii Abraham

Abraham genuit Isaac

₂₀qui cum quadraginta esset annorum

duxit uxorem Rebeccam filiam Bathuel Syri de

Mesopotamiam sororem Laban

₂₁deprecatusque est Dominum pro uxore

sua eo quod esset sterilis

qui exaudivit eum et dedit conceptum Rebeccae

₂₂sed conlidebantur in utero eius parvuli

quae ait si sic mihi futurum erat quid necesse fuit concipere

perrexitque ut consuleret Dominum

₂₃qui respondens ait duae gentes in utero tuo sunt

et duo populi ex ventre tuo dividentur

populusque populum superabit et maior minori serviet

₂₄iam tempus pariendi venerat

et ecce gemini in utero repperti sunt

₂₅qui primus egressus est rufus erat

et totus in morem pellis hispidus

vocatumque est nomen eius Esau

protinus alter egrediens plantam fratris tenebat manu

et idcirco appellavit eum Iacob

₂₆sexagenarius erat Isaac quando nati sunt parvuli

₂₇quibus adultis factus est Esau vir gnarus venandi et homo agricola

Iacob autem vir simplex habitabat in tabernaculis

₂₈Isaac amabat Esau eo quod de venationibus illius vesceretur

et Rebecca diligebat Iacob

₂₉coxit autem Iacob pulmentum

ad quem cum venisset Esau de agro lassus

₃₀ait

da mihi de coctione hac rufa quia oppido lassus sum

quam ob causam vocatum est nomen eius Edom

₃₁cui dixit Iacob vende mihi primogenita tua

₃₂ille respondit en morior quid mihi proderunt primogenita

₃₃ait Iacob iura ergo mihi

iuravit Esau et vendidit primogenita

₃₄et sic accepto pane et lentis edulio comedit et bibit

et abiit parvipendens quod primogenita vendidisset