LIBER GENESIS 30

₁cernens autem Rahel quod infecunda esset

invidit sorori et ait marito suo

da mihi liberos alioquin moriar

₂cui iratus respondit Iacob

num pro Deo ego sum qui privavit te fructu ventris tui

₃at illa habeo inquit famulam Balam ingredere ad eam

ut pariat super genua mea et habeam ex ea filios

₄deditque illi Balam in coniugium

quae

₅ingresso ad se viro concepit et peperit filium

₆dixitque Rahel iudicavit mihi Dominus

et exaudivit vocem meam dans mihi filium

et idcirco appellavit nomen illius Dan

₇rursumque Bala concipiens peperit alterum

₈pro quo ait Rahel conparavit me Deus cum sorore mea et invalui

vocavitque eum Nepthalim

₉sentiens Lia quod parere desisset

Zelpham ancillam suam marito tradidit

₁₀qua post conceptum edente filium

₁₁dixit feliciter

et idcirco vocavit nomen eius Gad

₁₂peperit quoque Zelpha alterum

₁₃dixitque Lia hoc pro beatitudine mea

beatam quippe me dicent mulieres

propterea appellavit eum Aser

₁₄egressus autem Ruben tempore messis triticeae

in agro repperit mandragoras

quos matri Liae detulit

dixitque Rahel da mihi partem de mandragoris filii tui

₁₅illa respondit parumne tibi videtur quod praeripueris maritum mihi

nisi etiam mandragoras filii mei tuleris

ait Rahel dormiat tecum hac nocte pro mandragoris filii tui

₁₆redeuntique ad vesperam de agro Iacob

egressa est in occursum Lia

et ad me inquit intrabis

quia mercede conduxi te pro mandragoris filii mei

dormivit cum ea nocte illa

₁₇et exaudivit Deus preces eius

concepitque et peperit filium quintum

₁₈et ait

dedit Deus mercedem mihi quia dedi ancillam meam viro meo

appellavitque nomen illius Isachar

₁₉rursum Lia concipiens peperit sextum filium

₂₀et ait

ditavit me Deus dote bona etiam hac vice

mecum erit maritus meus eo quod genuerim ei sex filios

et idcirco appellavit nomen eius Zabulon

₂₁post quem peperit filiam nomine Dinam

₂₂recordatus quoque Dominus Rahelis

exaudivit eam et aperuit vulvam illius

₂₃quae concepit et peperit filium dicens

abstulit Deus obprobrium meum

₂₄et vocavit nomen illius Ioseph dicens

addat mihi Dominus filium alterum

₂₅nato autem Ioseph dixit Iacob socero suo

dimitte me ut revertar in patriam et

ad terram meam

₂₆da mihi uxores et liberos meos pro quibus servivi tibi ut abeam

tu nosti servitutem qua servivi tibi

₂₇ait ei Laban inveniam gratiam in conspectu tuo

experimento didici quod benedixerit mihi Deus propter te

₂₈constitue mercedem tuam quam dem tibi

₂₉at ille respondit tu nosti quomodo servierim tibi

et quanta in manibus meis fuerit possessio tua

₃₀modicum habuisti antequam venirem

et nunc dives effectus es

benedixitque tibi Dominus ad introitum meum

iustum est igitur ut aliquando provideam etiam domui meae

₃₁dixitque Laban quid dabo tibi

at ille ait nihil volo

sed si feceris quod postulo iterum pascam et custodiam pecora tua

₃₂gyra omnes greges tuos

et separa cunctas oves varias et sparso vellere

et quodcumque furvum et maculosum variumque

fuerit

tam in ovibus quam in capris

erit merces mea

₃₃respondebitque mihi cras iustitia mea

quando placiti tempus advenerit coram te

et omnia quae non fuerint varia et maculosa et furva

tam in ovibus quam in capris furti me arguent

₃₄dixit Laban gratum habeo quod petis

₃₅et separavit in die illo capras et oves

hircos et arietes varios atque maculosos

cunctum autem gregem unicolorem id est albi et nigri velleris

tradidit in manu filiorum suorum

₃₆et posuit spatium itineris inter se et generum dierum trium

qui pascebat reliquos greges eius

₃₇tollens ergo Iacob virgas populeas virides et amigdalinas et ex platanis

ex parte decorticavit eas

detractisque corticibus in his quae spoliata fuerant candor apparuit

illa vero quae integra erant viridia permanserunt

atque in hunc modum color effectus est varius

₃₈posuitque eas in canalibus ubi effundebatur aqua

ut cum venissent greges ad bibendum ante oculos haberent virgas

et in aspectu earum conciperent

₃₉factumque est ut in ipso calore coitus oves intuerentur

virgas

et parerent maculosa et varia et diverso colore respersa

₄₀divisitque gregem Iacob

et posuit virgas ante oculos arietum

erant autem alba quaeque et nigra Laban

cetera vero Iacob separatis inter se gregibus

₄₁igitur quando primo tempore ascendebantur oves

ponebat Iacob virgas in canalibus aquarum

ante oculos arietum et ovium

ut in earum contemplatione conciperent

₄₂quando vero serotina admissura erat et conceptus

extremus non ponebat eas

factaque sunt ea quae erant serotina Laban

et quae primi temporis Iacob

₄₃ditatusque est homo ultra modum

et habuit greges multos ancillas et servos camelos et asinos