LIBER GENESIS 29

₁profectus ergo Iacob venit ad terram orientalem

₂et vidit puteum in agro

tresque greges ovium accubantes iuxta eum

nam ex illo adaquabantur pecora

et os eius grandi lapide claudebatur

₃morisque erat ut cunctis ovibus congregatis devolverent lapidem

et refectis gregibus rursum super os putei ponerent

₄dixitque ad pastores fratres unde estis

qui responderunt de Haran

₅quos interrogans numquid ait nostis Laban filium Nahor

dixerunt novimus

₆sanusne est inquit

valet inquiunt et ecce Rahel filia eius venit cum grege suo

₇dixitque Iacob adhuc multum diei superest

nec est tempus ut reducantur ad caulas greges

date ante potum ovibus et sic ad pastum eas reducite

₈qui responderunt non possumus donec omnia pecora congregentur

et amoveamus lapidem de ore putei ut adaquemus greges

₉adhuc loquebantur

et ecce Rahel veniebat cum ovibus patris sui

nam gregem ipsa pascebat

₁₀quam cum vidisset Iacob

et sciret consobrinam suam ovesque Laban avunculi sui

amovit lapidem quo puteus claudebatur

₁₁et adaquato grege osculatus est eam

elevataque voce flevit

₁₂et indicavit ei quod frater esset patris eius et filius

Rebeccae

at illa festinans nuntiavit patri suo

₁₃qui cum audisset venisse Iacob filium sororis suae cucurrit obviam

conplexusque eum et in oscula ruens duxit in domum suam

auditis autem causis itineris

₁₄respondit

os meum es et caro mea

et postquam expleti sunt dies mensis unius

₁₅dixit ei

num quia frater meus es gratis servies mihi

dic quid mercedis accipias

₁₆habebat vero filias duas

nomen maioris Lia

minor appellabatur Rahel

₁₇sed Lia lippis erat oculis

Rahel decora facie et venusto aspectu

₁₈quam diligens Iacob ait

serviam tibi pro Rahel filia tua minore septem annis

₁₉respondit Laban melius est ut tibi eam dem quam viro alteri

mane apud me

₂₀servivit igitur Iacob pro Rahel septem annis

et videbantur illi pauci dies prae amoris magnitudine

₂₁dixitque ad Laban da mihi uxorem meam

quia iam tempus expletum est ut ingrediar ad eam

₂₂qui vocatis multis amicorum turbis ad convivium fecit nuptias

₂₃et vespere filiam suam Liam introduxit ad eum

₂₄dans ancillam filiae Zelpham nomine

ad quam cum ex more Iacob fuisset ingressus

facto mane vidit Liam

₂₅et dixit ad socerum

quid est quod facere voluisti

nonne pro Rahel servivi tibi quare inposuisti mihi

₂₆respondit Laban non est in loco nostro consuetudinis

ut minores ante tradamus ad nuptias

₂₇imple ebdomadem dierum huius copulae

et hanc quoque dabo tibi

pro opere quo serviturus es mihi septem annis aliis

₂₈adquievit placito et ebdomade transacta Rahel duxit uxorem

₂₉cui pater servam Balam dederat

₃₀tandemque potitus optatis nuptiis

amorem sequentis priori praetulit

serviens apud eum septem annis aliis

₃₁videns autem Dominus quod despiceret Liam aperuit vulvam eius

sorore sterili permanente

₃₂quae conceptum genuit filium vocavitque nomen eius Ruben dicens

vidit Dominus humilitatem meam

nunc amabit me vir meus

₃₃rursumque concepit et peperit filium et ait

quoniam audivit Dominus haberi me contemptui

dedit etiam istum mihi

vocavitque nomen illius Symeon

₃₄concepit tertio et genuit alium dixitque

nunc quoque copulabitur mihi maritus meus

eo quod pepererim illi tres filios

et idcirco appellavit nomen eius Levi

₃₅quarto concepit et peperit filium et ait modo confitebor Domino

et ob hoc vocavit eum Iudam cessavitque parere