LIBER GENESIS 34

₁egressa est autem Dina filia Liae ut videret mulieres regionis illius

₂quam cum vidisset Sychem filius Emor Evei princeps terrae illius

adamavit et rapuit et dormivit cum illa

vi opprimens virginem

₃et conglutinata est anima eius cum ea

tristemque blanditiis delinivit

₄et pergens ad Emor patrem suum

accipe mihi inquit puellam hanc coniugem

₅quod cum audisset Iacob

absentibus filiis et in pastu occupatis pecorum

siluit donec redirent

₆egresso autem Emor patre Sychem ut loqueretur ad Iacob

₇ecce filii eius veniebant de agro

auditoque quod acciderat irati sunt valde

eo quod foedam rem esset operatus in Israhel

et violata filia Iacob rem inlicitam perpetrasset

₈locutus est itaque Emor ad eos

Sychem filii mei adhesit anima filiae vestrae

date eam illi uxorem

₉et iungamus vicissim conubia

filias vestras tradite nobis et filias nostras accipite

₁₀et habitate nobiscum

terra in potestate vestra est exercete negotiamini et possidete eam

₁₁sed et Sychem ad patrem et ad fratres eius ait

inveniam gratiam coram vobis et quaecumque statueritis dabo

₁₂augete dotem munera postulate

libens tribuam quod petieritis

tantum date mihi puellam hanc uxorem

₁₃responderunt filii Iacob Sychem et patri eius in dolo

saevientes ob stuprum sororis

₁₄non possumus facere quod petitis

nec dare sororem nostram homini incircumciso

quod inlicitum et nefarium est apud nos

₁₅sed in hoc valebimus foederari

si esse volueritis nostri similes

et circumcidatur in vobis omne masculini sexus

₁₆tunc dabimus et accipiemus mutuo filias nostras ac vestras

et habitabimus vobiscum erimusque unus populus

₁₇sin autem circumcidi nolueritis

tollemus filiam nostram et recedemus

₁₈placuit oblatio eorum Emor et Sychem filio eius

₁₉nec distulit adulescens quin statim quod petebatur expleret

amabat enim puellam valde

et ipse erat inclitus in omni domo patris sui

₂₀ingressique portam urbis locuti sunt populo

₂₁viri isti pacifici sunt et volunt habitare nobiscum

negotientur in terra et exerceant eam

quae spatiosa et lata cultoribus indiget

filias eorum accipiemus uxores et nostras illis dabimus

₂₂unum est quod differtur tantum bonum

si circumcidamus masculos nostros ritum gentis imitantes

₂₃et substantia eorum et pecora et cuncta quae possident nostra erunt

tantum in hoc adquiescamus

et habitantes simul unum efficiemus populum

₂₄adsensi sunt omnes circumcisis cunctis maribus

₂₅et ecce die tertio quando gravissimus vulnerum dolor est

arreptis duo Iacob filii Symeon et Levi fratres Dinae

gladiis

ingressi sunt urbem confidenter

interfectisque omnibus masculis

₂₆Emor et Sychem pariter necaverunt

tollentes Dinam de domo Sychem sororem suam

₂₇quibus egressis inruerunt super occisos ceteri filii Iacob

et depopulati sunt urbem in ultionem stupri

₂₈oves eorum et armenta et asinos cunctaque vastantes

quae in domibus et in agris erant

₂₉parvulos quoque et uxores eorum duxere captivas

₃₀quibus patratis audacter Iacob dixit ad Symeon et Levi

turbastis me

et odiosum fecistis Chananeis et Ferezeis

habitatoribus terrae huius

nos pauci sumus illi congregati percutient me

et delebor ego et domus mea

₃₁responderunt numquid ut scorto abuti debuere sorore

nostra