LIBER GENESIS 43

₁interim fames omnem terram vehementer premebat

₂consumptisque cibis quos ex Aegypto detulerant

dixit Iacob ad filios suos

revertimini et emite pauxillum escarum

₃respondit Iudas

denuntiavit nobis vir ille sub testificatione iurandi dicens

non videbitis faciem meam

nisi fratrem vestrum minimum adduxeritis vobiscum

₄si ergo vis mittere eum nobiscum pergemus pariter

et ememus tibi necessaria

₅si autem non vis non ibimus

vir enim ut saepe diximus denuntiavit nobis dicens

non videbitis faciem meam absque fratre vestro minimo

₆dixit eis Israhel in meam hoc fecistis miseriam

ut indicaretis ei et alium habere vos fratrem

₇at illi responderunt

interrogavit nos homo per ordinem nostram progeniem

si pater viveret si haberemus fratrem

et nos respondimus ei consequenter iuxta id quod fuerat sciscitatus

numquid scire poteramus quod dicturus esset

adducite vobiscum fratrem vestrum

₈Iudas quoque dixit patri suo

mitte puerum mecum ut proficiscamur et possimus vivere

ne moriamur nos et parvuli nostri

₉ego suscipio puerum de manu mea require illum

nisi reduxero et tradidero eum tibi

ero peccati in te reus omni tempore

₁₀si non intercessisset dilatio iam vice altera venissemus

₁₁igitur Israhel pater eorum dixit ad eos

si sic necesse est facite quod vultis

sumite de optimis terrae fructibus in vasis vestris

et deferte viro munera

modicum resinae et mellis et styracis et

stactes et terebinthi et amigdalarum

₁₂pecuniamque duplicem ferte vobiscum

et illam quam invenistis in sacculis reportate

ne forte errore factum sit

₁₃sed et fratrem vestrum tollite et ite ad virum

₁₄Deus autem meus omnipotens faciat vobis eum placabilem

et remittat vobiscum fratrem vestrum quem tenet et hunc Beniamin

ego autem quasi orbatus absque liberis ero

₁₅tulerunt ergo viri munera et pecuniam duplicem et Beniamin

descenderuntque in Aegyptum et steterunt coram Ioseph

₁₆quos cum ille vidisset et Beniamin simul

praecepit dispensatori domus suae dicens

introduc viros domum

et occide victimas et instrue convivium

quoniam mecum sunt comesuri meridie

₁₇fecit ille sicut fuerat imperatum

et introduxit viros domum

₁₈ibique exterriti dixerunt mutuo

propter pecuniam quam rettulimus prius in saccis

nostris introducti sumus

ut devolvat in nos calumniam

et violenter subiciat servituti et nos et asinos nostros

₁₉quam ob rem in ipsis foribus accedentes ad dispensatorem

₂₀locuti sunt

oramus domine ut audias

iam ante descendimus ut emeremus escas

₂₁quibus emptis cum venissemus ad diversorium

aperuimus sacculos nostros

et invenimus pecuniam in ore saccorum

quam nunc eodem pondere reportamus

₂₂sed et aliud adtulimus argentum

ut emamus quae necessaria sunt

non est in nostra conscientia

quis eam posuerit in marsuppiis nostris

₂₃at ille respondit pax vobiscum nolite timere

Deus vester et Deus patris vestri dedit vobis thesauros in sacculis

vestris

nam pecuniam quam dedistis mihi probatam ego habeo

eduxitque ad eos Symeon

₂₄et introductis domum adtulit aquam et laverunt pedes suos

deditque pabula asinis eorum

₂₅illi vero parabant munera donec ingrederetur Ioseph meridie

audierant enim quod ibi comesuri essent panem

₂₆igitur ingressus est Ioseph domum suam

obtuleruntque ei munera tenentes in manibus

et adoraverunt proni in terram

₂₇at ille clementer resalutatis eis interrogavit dicens

salvusne est pater vester senex de quo dixeratis mihi adhuc vivit

₂₈qui responderunt sospes est servus tuus pater noster adhuc vivit

et incurvati adoraverunt eum

₂₉adtollens autem oculos Ioseph

vidit Beniamin fratrem suum uterinum et ait

iste est frater vester parvulus de quo dixeratis mihi

et rursum Deus inquit misereatur tui fili mi

₃₀festinavitque quia commota fuerant viscera eius super fratre

suo

et erumpebant lacrimae

et introiens cubiculum flevit

₃₁rursusque lota facie egressus continuit se et ait ponite panes

₃₂quibus adpositis seorsum Ioseph et seorsum fratribus

Aegyptiis quoque qui vescebantur simul seorsum

inlicitum est enim Aegyptiis comedere cum Hebraeis

et profanum putant huiuscemodi convivium

₃₃sederunt coram eo primogenitus iuxta primogenita sua

et minimus iuxta aetatem suam

et mirabantur nimis

₃₄sumptis partibus quas ab eo acceperant

maiorque pars venit Beniamin ita ut quinque partibus excederet

biberuntque et inebriati sunt cum eo