LIBER GENESIS 42

₁audiens autem Iacob quod alimenta venderentur in Aegypto

dixit filiis suis quare neglegitis

₂audivi quod triticum venundetur in Aegypto

descendite et emite nobis necessaria

ut possimus vivere et non consumamur inopia

₃descendentes igitur fratres Ioseph decem

ut emerent frumenta in Aegypto

₄Beniamin domi retento ab Iacob qui dixerat fratribus eius

ne forte in itinere quicquam patiatur mali

₅ingressi sunt terram Aegypti

cum aliis qui pergebant ad emendum

erat autem fames in terra Chanaan

₆et Ioseph princeps Aegypti

atque ad illius nutum frumenta populis vendebantur

cumque adorassent eum fratres sui

₇et agnovisset eos

quasi ad alienos durius loquebatur interrogans eos unde venistis

qui responderunt de terra Chanaan ut emamus victui necessaria

₈et tamen fratres ipse cognoscens non est agnitus ab eis

₉recordatusque somniorum quae aliquando viderat ait

exploratores estis ut videatis infirmiora terrae venistis

₁₀qui dixerunt non est ita domine

sed servi tui venerunt ut emerent cibos

₁₁omnes filii unius viri sumus

pacifici venimus nec quicquam famuli tui machinantur mali

₁₂quibus ille respondit aliter est

inmunita terrae huius considerare venistis

₁₃et illi duodecim inquiunt servi tui fratres sumus

filii viri unius in terra Chanaan

minimus cum patre nostro est alius non est super

₁₄hoc est ait quod locutus sum exploratores estis

₁₅iam nunc experimentum vestri capiam

per salutem Pharaonis non egrediemini hinc

donec veniat frater vester minimus

₁₆mittite e vobis unum et adducat eum

vos autem eritis in vinculis

donec probentur quae dixistis utrum falsa an vera sint

alioquin per salutem Pharaonis exploratores estis

₁₇tradidit ergo eos custodiae tribus

diebus

₁₈die autem tertio eductis de carcere ait

facite quod dixi et vivetis Deum enim timeo

₁₉si pacifici estis frater vester unus ligetur in carcere

vos autem abite et ferte frumenta quae emistis in domos vestras

₂₀et fratrem vestrum minimum ad me adducite

ut possim vestros probare sermones

et non moriamini

fecerunt ut dixerat

₂₁et locuti sunt invicem

merito haec patimur quia peccavimus in fratrem nostrum

videntes angustiam animae illius cum deprecaretur nos

et non audivimus

idcirco venit super nos ista tribulatio

₂₂e quibus unus Ruben ait

numquid non dixi vobis nolite peccare in puerum

et non audistis me en sanguis eius exquiritur

₂₃nesciebant autem quod intellegeret Ioseph

eo quod per interpretem loquebatur ad eos

₂₄avertitque se parumper et flevit

et reversus locutus est ad eos

₂₅tollens Symeon et ligans illis

praesentibus

iussitque ministris ut implerent saccos eorum

tritico

et reponerent pecunias singulorum in sacculis suis

datis supra cibariis in via

qui fecerunt ita

₂₆at illi portantes frumenta in asinis profecti sunt

₂₇apertoque unus sacco

ut daret iumento pabulum in diversorio

contemplatus pecuniam in ore sacculi

₂₈dixit fratribus suis

reddita est mihi pecunia en habetur in sacco

et obstupefacti turbatique dixerunt mutuo

quidnam est hoc quod fecit nobis Deus

₂₉veneruntque ad Iacob patrem suum in terra

Chanaan

et narraverunt ei omnia quae accidissent sibi dicentes

₃₀locutus est nobis dominus terrae dure

et putavit nos exploratores provinciae

₃₁cui respondimus pacifici sumus nec ullas molimur insidias

₃₂duodecim fratres uno patre geniti sumus

unus non est super

minimus cum patre versatur in terra Chanaan

₃₃qui ait nobis sic probabo quod pacifici sitis

fratrem vestrum unum dimittite apud me

et cibaria domibus vestris necessaria sumite et abite

₃₄fratremque vestrum minimum adducite ad me

ut sciam quod non sitis exploratores

et istum qui tenetur in vinculis recipere possitis

ac deinceps emendi quae vultis habeatis licentiam

₃₅his dictis cum frumenta effunderent singuli

reppererunt in ore saccorum ligatas pecunias

exterritisque simul omnibus

₃₆dixit pater Iacob

absque liberis me esse fecistis Ioseph non est super

Symeon tenetur in vinculis Beniamin auferetis

in me haec mala omnia reciderunt

₃₇cui respondit Ruben

duos filios meos interfice si non reduxero illum tibi

trade in manu mea

et ego eum restituam

₃₈at ille non descendet inquit filius meus vobiscum

frater eius mortuus est ipse solus remansit

si quid ei adversi acciderit in terra ad quam pergitis

deducetis canos meos cum dolore ad inferos