LIBER GENESIS 41

₁post duos annos vidit Pharao somnium

putabat se stare super fluvium

₂de quo ascendebant septem boves pulchrae et crassae nimis

et pascebantur in locis palustribus

₃aliae quoque septem emergebant de flumine foedae confectaeque macie

et pascebantur in ipsa amnis ripa in locis virentibus

₄devoraveruntque eas quarum mira species et habitudo corporum erat

expergefactus Pharao

₅rursum dormivit et vidit alterum somnium

septem spicae pullulabant in culmo uno plenae atque formonsae

₆aliae quoque totidem spicae tenues et percussae uredine oriebantur

₇devorantes omnem priorum pulchritudinem

evigilans post quietem

₈et facto mane pavore perterritus

misit ad coniectores Aegypti cunctosque sapientes

et accersitis narravit somnium nec erat qui interpretaretur

₉tunc demum reminiscens pincernarum magister ait

confiteor peccatum meum

₁₀iratus rex servis suis

me et magistrum pistorum retrudi iussit in carcerem

principis militum

₁₁ubi una nocte uterque vidimus somnium praesagum futurorum

₁₂erat ibi puer hebraeus eiusdem ducis militum famulus

cui narrantes somnia

₁₃audivimus quicquid postea rei probavit eventus

ego enim redditus sum officio meo et ille suspensus est in cruce

₁₄protinus ad regis imperium eductum de carcere Ioseph totonderunt

ac veste mutata obtulerunt ei

₁₅cui ille ait vidi somnia nec est qui edisserat

quae audivi te prudentissime conicere

₁₆respondit Ioseph absque me Deus respondebit prospera Pharaoni

₁₇narravit ergo ille quod viderat

putabam me stare super ripam fluminis

₁₈et septem boves de amne conscendere pulchras nimis et obesis carnibus

quae in pastu paludis virecta carpebant

₁₉et ecce has sequebantur aliae septem boves

in tantum deformes et macilentae

ut numquam tales in terra Aegypti viderim

₂₀quae devoratis et consumptis prioribus

₂₁nullum saturitatis dedere vestigium

sed simili macie et squalore torpebant

evigilans rursum sopore depressus

₂₂vidi somnium

septem spicae pullulabant in culmo uno plenae atque pulcherrimae

₂₃aliae quoque septem tenues et percussae uredine oriebantur stipula

₂₄quae priorum pulchritudinem devorarunt

narravi coniectoribus somnium

et nemo est qui edisserat

₂₅respondit Ioseph somnium regis unum est

quae facturus est Deus ostendit Pharaoni

₂₆septem boves pulchrae et septem spicae plenae

septem ubertatis anni sunt

eandemque vim somnii conprehendunt

₂₇septem quoque boves tenues atque macilentae

quae ascenderunt post eas

et septem spicae tenues et vento urente percussae

septem anni sunt venturae famis

₂₈qui hoc ordine conplebuntur

₂₉ecce septem anni venient fertilitatis magnae in universa terra Aegypti

₃₀quos sequentur septem anni alii tantae sterilitatis

ut oblivioni tradatur cuncta retro abundantia

consumptura est enim fames omnem terram

₃₁et ubertatis magnitudinem perditura inopiae

magnitudo

₃₂quod autem vidisti secundo ad eandem rem pertinens somnium

firmitatis indicium est

eo quod fiat sermo Dei et velocius impleatur

₃₃nunc ergo provideat rex virum sapientem et industrium

et praeficiat eum terrae Aegypti

₃₄qui constituat praepositos per singulas regiones

et quintam partem fructuum

per septem annos fertilitatis

₃₅qui iam nunc futuri sunt

congreget in horrea

et omne frumentum sub Pharaonis potestate condatur

serveturque in urbibus

₃₆et paretur futurae septem annorum fami

quae pressura est Aegyptum

et non consumetur terra inopia

₃₇placuit Pharaoni consilium et cunctis ministris eius

₃₈locutusque est ad eos

num invenire poterimus talem virum qui spiritu Dei plenus sit

₃₉dixit ergo ad Ioseph

quia ostendit Deus tibi omnia quae locutus es

numquid sapientiorem et similem tui invenire potero

₄₀tu eris super domum meam

et ad tui oris imperium cunctus populus oboediet

uno tantum regni solio te praecedam

₄₁dicens quoque rursum Pharao ad Ioseph

ecce constitui te super universam terram Aegypti

₄₂tulit anulum de manu sua et dedit in manu eius

vestivitque eum stola byssina

et collo torquem auream circumposuit

₄₃fecitque ascendere super currum suum secundum

clamante praecone ut omnes coram eo genu flecterent

et praepositum esse scirent universae terrae Aegypti

₄₄dixit quoque rex ad Ioseph ego sum Pharao

absque tuo imperio non movebit quisquam manum aut pedem

in omni terra Aegypti

₄₅vertitque nomen illius

et vocavit eum lingua aegyptiaca Salvatorem mundi

dedit quoque illi uxorem

Aseneth filiam Putiphare sacerdotis Heliopoleos

egressus itaque Ioseph ad terram Aegypti

₄₆triginta autem erat annorum

quando stetit in conspectu regis Pharaonis

circuivit omnes regiones Aegypti

₄₇venitque fertilitas septem annorum

et in manipulos redactae segetes congregatae sunt in horrea Aegypti

₄₈omnis etiam frugum abundantia in singulis urbibus condita est

₄₉tantaque fuit multitudo tritici

ut harenae maris coaequaretur

et copia mensuram excederet

₅₀nati sunt autem Ioseph filii duo antequam veniret fames

quos ei peperit Aseneth filia Putiphare

sacerdotis Heliopoleos

₅₁vocavitque nomen primogeniti Manasse dicens

oblivisci me fecit Deus omnium laborum meorum et domum patris mei

₅₂nomen quoque secundi appellavit Ephraim dicens

crescere me fecit Deus in terra paupertatis meae

₅₃igitur transactis septem annis ubertatis

qui fuerant in Aegypto

₅₄coeperunt venire septem anni inopiae quos praedixerat Ioseph

et in universo orbe fames praevaluit

in cuncta autem terra Aegypti erat panis

₅₅qua esuriente clamavit populus ad Pharaonem alimenta petens

quibus ille respondit ite ad Ioseph

et quicquid vobis dixerit facite

₅₆crescebat autem cotidie fames in omni terra

aperuitque Ioseph universa horrea et vendebat Aegyptiis

nam et illos oppresserat fames

₅₇omnesque provinciae veniebant in Aegyptum ut emerent escas

et malum inopiae temperarent