LIBER GENESIS 40

₁his ita gestis accidit ut peccarent duo eunuchi

pincerna regis Aegypti et pistor domino suo

₂iratusque Pharao contra eos

nam alter pincernis praeerat alter pistoribus

₃misit eos in carcerem principis militum

in quo erat vinctus et Ioseph

₄at custos carceris tradidit eos Ioseph qui et ministrabat eis

aliquantum temporis fluxerat

et illi in custodia tenebantur

₅videruntque ambo somnium nocte una

iuxta interpretationem congruam sibi

₆ad quos cum introisset Ioseph mane et vidisset eos tristes

₇sciscitatus est dicens

cur tristior est hodie solito facies vestra

₈qui responderunt

somnium vidimus et non est qui interpretetur nobis

dixitque ad eos Ioseph numquid non Dei est interpretatio

referte mihi quid videritis

₉narravit prior praepositus pincernarum somnium

videbam coram me vitem

₁₀in qua erant tres propagines

crescere paulatim gemmas et post flores uvas maturescere

₁₁calicemque Pharaonis in manu mea

tuli ergo uvas et expressi in calicem quem tenebam

et tradidi poculum Pharaoni

₁₂respondit Ioseph haec est interpretatio somnii

tres propagines tres adhuc dies sunt

₁₃post quos recordabitur Pharao magisterii tui

et restituet te in gradum pristinum

dabisque ei calicem iuxta officium tuum

sicut facere ante consueveras

₁₄tantum memento mei cum tibi bene fuerit

et facies mecum misericordiam

ut suggeras Pharaoni et educat me de isto carcere

₁₅quia furto sublatus sum de terra Hebraeorum

et hic innocens in lacum missus sum

₁₆videns pistorum magister quod prudenter somnium dissolvisset ait

et ego vidi somnium

quod haberem tria canistra farinae super caput meum

₁₇et in uno canistro quod erat excelsius

portare me omnes cibos qui fiunt arte pistoria

avesque comedere ex eo

₁₈respondit Ioseph haec est interpretatio somnii

tria canistra tres adhuc dies sunt

₁₉post quos auferet Pharao caput tuum

ac suspendet te in cruce

et lacerabunt volucres carnes tuas

₂₀exin dies tertius natalicius Pharaonis

erat

qui faciens grande convivium pueris suis

recordatus est inter epulas magistri pincernarum et pistorum principis

₂₁restituitque alterum in locum suum

ut porrigeret regi poculum

₂₂alterum suspendit in patibulo ut coniectoris veritas probaretur

₂₃et tamen succedentibus prosperis

praepositus pincernarum oblitus est interpretis sui