LIBER GENESIS 8

₁recordatus autem Deus Noe cunctarumque animantium

et omnium iumentorum quae erant cum eo in arca

adduxit spiritum super terram et inminutae sunt aquae

₂et clausi sunt fontes abyssi et cataractae caeli

et prohibitae sunt pluviae de caelo

₃reversaeque aquae de terra euntes et redeuntes

et coeperunt minui post centum quinquaginta dies

₄requievitque arca mense septimo vicesima septima die mensis super montes Armeniae

₅at vero aquae ibant et decrescebant usque ad decimum mensem

decimo enim mense prima die mensis apparuerunt cacumina montium

₆cumque transissent quadraginta dies

aperiens Noe fenestram arcae quam fecerat dimisit corvum

₇qui egrediebatur et revertebatur donec siccarentur aquae super terram

₈emisit quoque columbam post eum ut videret si iam cessassent aquae super faciem terrae

₉quae cum non invenisset ubi requiesceret pes eius reversa est ad eum in arcam

aquae enim erant super universam terram

extenditque manum et adprehensam intulit in arcam

₁₀expectatis autem ultra septem diebus aliis rursum dimisit columbam ex arca

₁₁at illa venit ad eum ad vesperam

portans ramum olivae virentibus foliis in ore suo

intellexit ergo Noe quod cessassent aquae super terram

₁₂expectavitque nihilominus septem alios dies et emisit columbam

quae non est reversa ultra ad eum

₁₃igitur sescentesimo primo anno primo mense prima die mensis

inminutae sunt aquae super terram

et aperiens Noe tectum arcae aspexit viditque quod exsiccata esset superficies terrae

₁₄mense secundo septima et vicesima die mensis arefacta est terra

₁₅locutus est autem Deus ad Noe dicens

₁₆egredere de arca tu et uxor tua

filii tui et uxores filiorum tuorum tecum

₁₇cuncta animantia quae sunt apud te ex omni carne

tam in volatilibus quam in bestiis

et in universis reptilibus quae reptant super terram

educ tecum et ingredimini super terram

crescite et multiplicamini super eam

₁₈egressus est ergo Noe et filii eius

uxor illius et uxores filiorum eius cum eo

₁₉sed et omnia animantia iumenta et reptilia quae repunt super terram

secundum genus suum arcam egressa sunt

₂₀aedificavit autem Noe altare Domino

et tollens de cunctis pecoribus et volucribus mundis obtulit holocausta super altare

₂₁odoratusque est Dominus odorem suavitatis et ait ad eum

nequaquam ultra maledicam terrae propter homines

sensus enim et cogitatio humani cordis in malum prona sunt ab adulescentia sua

non igitur ultra percutiam omnem animantem sicut feci

₂₂cunctis diebus terrae sementis et messis frigus et aestus

aestas et hiemps nox et dies non requiescent