LIBER GENESIS 9

₁benedixitque Deus Noe et filiis eius et dixit ad eos

crescite et multiplicamini et implete terram

₂et terror vester ac tremor sit super cuncta animalia terrae

et super omnes volucres caeli cum universis quae moventur in terra

omnes pisces maris manui vestrae traditi sunt

₃et omne quod movetur et vivit erit vobis in cibum

quasi holera virentia tradidi vobis omnia

₄excepto quod carnem cum sanguine non comedetis

₅sanguinem enim animarum vestrarum requiram de manu cunctarum bestiarum et de manu hominis

de manu viri et fratris eius requiram animam hominis

₆quicumque effuderit humanum sanguinem fundetur sanguis illius

ad imaginem quippe Dei factus est homo

₇vos autem crescite et multiplicamini

et ingredimini super terram et implete eam

₈haec quoque dixit Deus ad Noe et ad filios eius cum eo

₉ecce ego statuam pactum meum vobiscum et cum semine vestro post vos

₁₀et ad omnem animam viventem quae est vobiscum

tam in volucribus quam in iumentis et pecudibus terrae

cunctis quae egressa sunt de arca et universis bestiis terrae

₁₁statuam pactum meum vobiscum

et nequaquam ultra interficietur omnis caro aquis diluvii neque erit deinceps diluvium dissipans terram

₁₂dixitque Deus

hoc signum foederis quod do inter me et vos

et ad omnem animam viventem quae est vobiscum in generationes sempiternas

₁₃arcum meum ponam in nubibus

et erit signum foederis inter me et inter terram

₁₄cumque obduxero nubibus caelum

apparebit arcus meus in nubibus

₁₅et recordabor foederis mei vobiscum

et cum omni anima vivente quae carnem vegetat

et non erunt ultra aquae diluvii ad delendam universam carnem

₁₆eritque arcus in nubibus et videbo illum et recordabor foederis sempiterni

quod pactum est inter Deum et inter omnem animam viventem universae carnis quae est super terram

₁₇dixitque Deus Noe

hoc erit signum foederis quod constitui inter me et inter omnem carnem super terram

₁₈erant igitur filii Noe qui egressi sunt de arca Sem Ham et Iafeth

porro Ham ipse est pater Chanaan

₁₉tres isti sunt filii Noe et ab his disseminatum est omne hominum genus super universam terram

₂₀coepitque Noe vir agricola exercere terram

et plantavit vineam ₂₁bibensque vinum inebriatus est et nudatus in tabernaculo suo

₂₂quod cum vidisset Ham pater Chanaan

verenda scilicet patris sui esse nuda

nuntiavit duobus fratribus suis foras

₂₃at vero Sem et Iafeth pallium inposuerunt umeris suis

et incedentes retrorsum operuerunt verecunda patris sui

faciesque eorum aversae erant et patris virilia non viderunt

₂₄evigilans autem Noe ex vino

cum didicisset quae fecerat ei filius suus minor ₂₅ait

maledictus Chanaan

servus servorum erit fratribus suis

₂₆dixitque

benedictus Dominus Deus Sem

sit Chanaan servus eius

₂₇dilatet Deus Iafeth et habitet in tabernaculis Sem

sitque Chanaan servus eius

₂₈vixit autem Noe post diluvium trecentis quinquaginta annis

₂₉et impleti sunt omnes dies eius nongentorum quinquaginta annorum et mortuus est