AD HEBRAEOS 7

₁hic enim Melchisedech rex Salem sacerdos Dei summi

qui obviavit Abrahae regresso a caede regum et benedixit ei

₂cui decimas omnium divisit Abraham

primum quidem qui interpretatur rex iustitiae

deinde autem et rex Salem quod est rex pacis

₃sine patre sine matre sine genealogia

neque initium dierum neque finem vitae habens

adsimilatus autem Filio Dei manet sacerdos in perpetuum

₄intuemini autem quantus sit hic

cui et decimam dedit de praecipuis Abraham patriarcha

₅et quidem de filiis Levi sacerdotium accipientes

mandatum habent decimas sumere a populo secundum legem

id est a fratribus suis

quamquam et ipsi exierunt de lumbis Abrahae

₆cuius autem generatio non adnumeratur in eis

decimas sumpsit Abraham

et hunc qui habebat repromissiones benedixit

₇sine ulla autem contradictione

quod minus est a meliore benedicitur

₈et hic quidem decimas morientes homines accipiunt

ibi autem contestatus quia vivit

₉et ut ita dictum sit

per Abraham et Levi qui decimas accipit decimatus est

₁₀adhuc enim in lumbis patris erat

quando obviavit ei Melchisedech

₁₁si ergo consummatio per sacerdotium leviticum erat

populus enim sub ipso legem accepit

quid adhuc necessarium

secundum ordinem Melchisedech alium surgere sacerdotem

et non secundum ordinem Aaron dici

₁₂translato enim sacerdotio

necesse est ut et legis translatio fiat

₁₃in quo enim haec dicuntur de alia tribu est

de qua nullus altario praesto fuit

₁₄manifestum enim

quod ex Iuda ortus sit Dominus noster

in qua tribu nihil de sacerdotibus Moses locutus est

₁₅et amplius adhuc manifestum est

si secundum similitudinem Melchisedech

exsurgit alius sacerdos

₁₆qui non secundum legem mandati carnalis factus est

sed secundum virtutem vitae insolubilis

₁₇contestatur enim

quoniam tu es sacerdos in aeternum secundum ordinem Melchisedech

₁₈reprobatio quidem fit praecedentis mandati

propter infirmitatem eius et inutilitatem

₁₉nihil enim ad perfectum adduxit lex

introductio vero melioris spei per quam proximamus ad Deum

₂₀et quantum est non sine iureiurando

alii quidem sine iureiurando sacerdotes facti sunt

₂₁hic autem cum iureiurando per eum qui dixit ad illum

iuravit Dominus et non paenitebit

tu es sacerdos in aeternum

₂₂in tantum melioris testamenti sponsor factus est Iesus

₂₃et alii quidem plures facti sunt sacerdotes

idcirco quod morte prohiberentur permanere

₂₄hic autem eo quod maneat in aeternum

sempiternum habet sacerdotium

₂₅unde et salvare in perpetuo potest

accedentes per semet ipsum ad Deum

semper vivens ad interpellandum pro eis

₂₆talis enim decebat ut nobis esset pontifex

sanctus innocens inpollutus segregatus a peccatoribus

et excelsior caelis factus

₂₇qui non habet cotidie necessitatem

quemadmodum sacerdotes prius pro suis delictis hostias offerre

deinde pro populi

hoc enim fecit semel se offerendo

₂₈lex enim homines constituit sacerdotes infirmitatem habentes

sermo autem iurisiurandi qui post legem est

Filium in aeternum perfectum