EPISTULA IACOBI 5

₁age nunc divites

plorate ululantes in miseriis quae advenient vobis

₂divitiae vestrae putrefactae sunt

et vestimenta vestra a tineis comesta sunt

₃aurum et argentum vestrum eruginavit

et erugo eorum in testimonium vobis erit

et manducabit carnes vestras sicut ignis

thesaurizastis in novissimis diebus

₄ecce merces operariorum qui messuerunt regiones vestras

qui fraudatus est a vobis clamat

et clamor ipsorum in aures Domini Sabaoth introiit

₅epulati estis super terram

et in luxuriis enutristis corda vestra

in die occisionis

₆addixistis

occidistis iustum non resistit vobis

₇patientes igitur estote fratres usque ad adventum Domini

ecce agricola expectat pretiosum fructum terrae patienter ferens

donec accipiat temporivum et serotinum

₈patientes estote et vos confirmate corda

vestra

quoniam adventus Domini adpropinquavit

₉nolite ingemescere fratres in alterutrum ut non iudicemini

ecce iudex ante ianuam adsistit

₁₀exemplum accipite fratres laboris et patientiae

prophetas qui locuti sunt in nomine Domini

₁₁ecce beatificamus qui sustinuerunt

sufferentiam Iob audistis et finem Domini vidistis

quoniam misericors est Dominus et miserator

₁₂ante omnia autem fratres mei

nolite iurare neque per caelum neque per terram

neque aliud quodcumque iuramentum

sit autem vestrum est est non non

uti non sub iudicio decidatis

₁₃tristatur aliquis vestrum oret

aequo animo est psallat

₁₄infirmatur quis in vobis

inducat presbyteros ecclesiae et orent super eum

unguentes eum oleo in nomine Domini

₁₅et oratio fidei salvabit infirmum

et adlevabit eum Dominus

et si in peccatis sit dimittentur ei

₁₆confitemini ergo alterutrum peccata vestra

et orate pro invicem ut salvemini

multum enim valet deprecatio iusti adsidua

₁₇Helias homo erat similis nobis passibilis

et oratione oravit ut non plueret super terram

et non pluit annos tres et menses sex

₁₈et rursum oravit et caelum dedit pluviam

et terra dedit fructum suum

₁₉fratres mei si quis ex vobis erraverit a veritate

et converterit quis eum

₂₀scire debet quoniam

qui converti fecerit peccatorem ab errore viae suae

salvabit animam eius a morte

et operit multitudinem peccatorum