AD LAODICENSES 1

₁Paulus apostolus non ab hominibus neque per hominem sed per Iesum Christum, fratribus qui sunt Laodiciae. ₂Gratia vobis et pax a Deo Patre et Domino Iesu Christo.

₃Gratias ago Christo per omnem orationem meam, quod permanentes estis in eo et perseverantes in operibus eius, promissum expectantes in diem iudicii. ₄Neque destituant vos quorundam vaniloquia insinuantium, ut vos evertant a veritate evangelii quod a me praedicatur. ₅Et nunc faciet Deus, ut qui sunt ex me ad profectum veritatis evangelii deservientes et facientes benignitatem operum quae salutis vitae aeternae.

₆Et nunc palam sunt vincula mea quae patior in Christo; quibus laetor et gaudeo. ₇Et hoc mihi est ad salutem perpetuam; quod ipsum factum orationibus vestris et administrantem Spiritum Sanctum, sive per vitam sive per mortem. ₈Est enim mihi vere vita in Christo et mori gaudium. ₉Et in ipsum in vobis faciet misericordiam suam, ut eandem dilectionem habeatis et sitis unianimes.

₁₀Ergo, dilectissimi, ut audistis praesentia mei, ita retinete et facite in timore Dei, et erit vobis vita in aeternum; ₁₁est enim Deus qui operatur in vos. ₁₂Et facite sine retractu quaecumque facitis.

₁₃Et quod est, dilectissimi, gaudete in Christo. Et praecavete sordidos in lucro. ₁₄Omnes sint petitiones vestrae palam apud Deum. Et estote firmi in sensu Christi. ₁₅Et quae integra et vera et pudica et iusta et amabilia facite. ₁₆Et quae audistis et accepistis, in corde retinete, et erit vobis pax.

₁₈Salutant vos sancti. ₁₉Gratia Domini Iesu cum spiritu vestro. ₂₀Et facite legi Colosensium vobis.