APOCALYPSIS IOHANNIS 22

₁et ostendit mihi fluvium aquae vitae

splendidum tamquam cristallum

procedentem de sede Dei et agni

₂in medio plateae eius

et ex utraque parte fluminis lignum vitae

adferens fructus duodecim

per menses singula reddentia fructum suum

et folia ligni ad sanitatem gentium

₃et omne maledictum non erit amplius

et sedes Dei et agni in illa erunt

et servi eius servient illi

₄et videbunt faciem eius et nomen eius in frontibus eorum

₅et nox ultra non erit

et non egebunt lumine lucernae

neque lumine solis

quoniam Dominus Deus inluminat illos

et regnabunt in saecula saeculorum

₆et dixit mihi haec verba fidelissima et vera sunt

et Dominus Deus spirituum prophetarum

misit angelum suum ostendere servis suis quae oportet fieri cito

₇et ecce venio velociter

beatus qui custodit verba prophetiae libri huius

₈et ego Iohannes qui audivi et vidi haec

et postquam audissem et vidissem

cecidi ut adorarem ante pedes angeli qui mihi haec ostendebat

₉et dicit mihi vide ne feceris

conservus tuus sum et fratrum tuorum prophetarum

et eorum qui servant verba libri huius

Deum adora

₁₀et dicit mihi ne signaveris verba prophetiae libri huius

tempus enim prope est

₁₁qui nocet noceat adhuc

et qui in sordibus est sordescat adhuc

et iustus iustitiam faciat

adhuc

et sanctus sanctificetur adhuc

₁₂ecce venio cito et merces mea mecum est

reddere unicuique secundum opera sua

₁₃ego Α et ω primus et novissimus principium et finis

₁₄beati qui lavant stolas suas

ut sit potestas eorum in ligno vitae

et portis intrent in civitatem

₁₅foris canes et venefici et inpudici

et homicidae et idolis servientes

et omnis qui amat et facit mendacium

₁₆ego Iesus misi angelum meum testificari vobis haec in ecclesiis

ego sum radix et genus David stella splendida et matutina

₁₇et Spiritus et sponsa dicunt veni et qui audit dicat veni

et qui sitit veniat

qui vult accipiat aquam vitae gratis

₁₈contestor ego omni audienti verba prophetiae libri huius

si quis adposuerit ad haec

adponet Deus super illum plagas scriptas in libro isto

₁₉et si quis deminuerit de verbis libri prophetiae

huius

auferet Deus partem eius de ligno vitae

et de civitate sancta et de his quae scripta sunt in libro isto

₂₀dicit qui testimonium perhibet istorum

etiam venio cito amen veni Domine Iesu

₂₁gratia Domini nostri Iesu Christi cum omnibus