APOCALYPSIS IOHANNIS 20

₁et vidi angelum descendentem de caelo habentem clavem abyssi

et catenam magnam in manu sua

₂et adprehendit draconem serpentem antiquum

qui est diabolus et Satanas

et ligavit eum per annos mille

₃et misit eum in abyssum

et clusit et signavit super illum ut non seducat amplius gentes

donec consummentur mille anni

post haec oportet illum solvi modico tempore

₄et vidi sedes et sederunt super eas et iudicium datum est illis

et animas decollatorum propter testimonium Iesu

et propter verbum Dei

et qui non adoraverunt bestiam neque imaginem eius

nec acceperunt caracterem in frontibus aut in

manibus suis

et vixerunt et regnaverunt cum Christo mille annis

₅ceteri mortuorum non vixerunt donec consummentur mille anni

haec est resurrectio prima

₆beatus et sanctus qui habet partem in resurrectione prima

in his secunda mors non habet potestatem

sed erunt sacerdotes Dei et Christi

et regnabunt cum illo mille annis

₇et cum consummati fuerint mille anni

solvetur Satanas de carcere suo

et exibit et seducet gentes

quae sunt super quattuor angulos terrae Gog et Magog

et congregabit eos in proelium

quorum numerus est sicut harena maris

₈et ascenderunt super latitudinem terrae

et circumierunt castra sanctorum et civitatem dilectam

₉et descendit ignis a Deo de caelo et devoravit eos

et diabolus qui seducebat eos missus est in stagnum ignis et sulphuris

ubi et bestia

₁₀et pseudoprophetes

et cruciabuntur die ac nocte in saecula saeculorum

₁₁et vidi thronum magnum candidum et sedentem super eum

a cuius aspectu fugit terra et caelum

et locus non est inventus ab eis

₁₂et vidi mortuos magnos et pusillos stantes in conspectu throni

et libri aperti sunt

et alius liber apertus est qui est vitae

et iudicati sunt mortui ex his quae scripta erant in libris

secundum opera ipsorum

₁₃et dedit mare mortuos qui in eo erant

et mors et inferus dederunt mortuos

qui in ipsis erant

et iudicatum est de singulis

secundum opera ipsorum

₁₄et inferus et mors missi sunt in stagnum ignis

haec mors secunda est stagnum ignis

₁₅et qui non est inventus in libro vitae scriptus

missus est in stagnum ignis