APOCALYPSIS IOHANNIS 7

₁post haec vidi quattuor angelos

stantes super quattuor angulos terrae

tenentes quattuor ventos terrae

ne flaret ventus super terram

neque super mare neque in ullam arborem

₂et vidi alterum angelum ascendentem ab ortu solis

habentem signum Dei vivi

et clamavit voce magna quattuor angelis

quibus datum est nocere terrae et mari

₃dicens nolite nocere terrae neque mari neque arboribus

quoadusque signemus servos Dei nostri in frontibus eorum

₄et audivi numerum signatorum

centum quadraginta quattuor milia signati

ex omni tribu filiorum Israhel

₅ex tribu Iuda duodecim milia signati

ex tribu Ruben duodecim milia

ex tribu Gad duodecim milia

₆ex tribu Aser duodecim milia

ex tribu Nepthalim duodecim milia

ex tribu Manasse duodecim milia

₇ex tribu Symeon duodecim milia

ex tribu Levi duodecim milia

ex tribu Issachar duodecim milia

₈ex tribu Zabulon duodecim milia

ex tribu Ioseph duodecim milia

ex tribu Beniamin duodecim milia signati

₉post haec vidi turbam magnam quam dinumerare nemo poterat

ex omnibus gentibus et tribubus et populis et linguis

stantes ante thronum et in conspectu agni

amicti stolas albas

et palmae in manibus eorum

₁₀et clamabant voce magna dicentes

salus Deo nostro qui sedet super thronum et agno

₁₁et omnes angeli stabant in circuitu throni

et seniorum et quattuor animalium

et ceciderunt in conspectu throni in facies suas

et adoraverunt Deum

₁₂dicentes amen

benedictio et claritas et sapientia et gratiarum actio

et honor et virtus et fortitudo Deo nostro

in saecula saeculorum amen

₁₃et respondit unus de senioribus dicens

mihi

hii qui amicti sunt stolis albis qui sunt et unde venerunt

₁₄et dixi illi domine mi tu scis

et dixit mihi

hii sunt qui veniunt de tribulatione magna

et laverunt stolas suas et dealbaverunt eas in sanguine agni

₁₅ideo sunt ante thronum Dei

et serviunt ei die ac nocte in templo eius

et qui sedet in throno habitabit super illos

₁₆non esurient neque sitient amplius

neque cadet super illos sol neque ullus aestus

₁₇quoniam agnus qui in medio throni est reget illos

et deducet eos ad vitae fontes aquarum

et absterget Deus omnem lacrimam ex oculis eorum