APOCALYPSIS IOHANNIS 8

₁et cum aperuisset sigillum septimum

factum est silentium in caelo quasi media hora

₂et vidi septem angelos stantes in conspectu Dei

et datae sunt illis septem tubae

₃et alius angelus venit et stetit ante altare

habens turibulum aureum

et data sunt illi incensa multa

ut daret orationibus sanctorum omnium

super altare aureum quod est ante thronum

₄et ascendit fumus incensorum de orationibus sanctorum

de manu angeli coram Deo

₅et accepit angelus turibulum

et implevit illud de igne altaris et misit in terram

et facta sunt tonitrua et voces et fulgora et terraemotus

₆et septem angeli qui habebant septem tubas

paraverunt se ut tuba canerent

₇et primus tuba cecinit

et facta est grando et ignis mixta in sanguine

et missum est in terram

et tertia pars terrae conbusta est

et tertia pars arborum conbusta est

et omne faenum viride conbustum est

₈et secundus angelus tuba cecinit

et tamquam mons magnus igne ardens missus est in mare

et facta est tertia pars maris sanguis

₉et mortua est tertia pars creaturae quae habent animas

et tertia pars navium interiit

₁₀et tertius angelus tuba cecinit

et cecidit de caelo stella magna ardens tamquam facula

et cecidit in tertiam partem fluminum

et in fontes aquarum

₁₁et nomen stellae dicitur Absinthius

et facta est tertia pars aquarum in absinthium

et multi hominum mortui sunt de aquis

quia amarae factae sunt

₁₂et quartus angelus tuba cecinit

et percussa est tertia pars solis

et tertia pars lunae et tertia pars stellarum

ut obscuraretur tertia pars eorum

et diei non luceret pars tertia

et nox similiter

₁₃et vidi et audivi vocem unius aquilae

volantis per medium caelum dicentis voce magna

vae vae vae habitantibus in terra

de ceteris vocibus tubae trium angelorum

qui erant tuba canituri