APOCALYPSIS IOHANNIS 9

₁et quintus angelus tuba cecinit

et vidi stellam de caelo cecidisse in terram

et data est illi clavis putei abyssi

₂et aperuit puteum abyssi

et ascendit fumus putei sicut fumus fornacis magnae

et obscuratus est sol et aer de fumo putei

₃et de fumo exierunt lucustae in terram

et data est illis potestas sicut habent potestatem scorpiones terrae

₄et praeceptum est illis ne laederent faenum terrae

neque omne viride neque omnem arborem nisi tantum homines

qui non habent signum Dei in frontibus

₅et datum est illis ne occiderent eos

sed ut cruciarentur mensibus quinque

et cruciatus eorum ut cruciatus scorpii cum percutit hominem

₆et in diebus illis quaerent homines mortem

et non invenient eam

et desiderabunt mori et fugiet mors ab ipsis

₇et similitudines lucustarum similes equis paratis in proelium

et super capita earum tamquam coronae similes auro

et facies earum sicut facies hominum

₈et habebant capillos sicut capillos mulierum

et dentes earum sicut leonum erant

₉et habebant loricas sicut loricas ferreas

et vox alarum earum sicut vox curruum equorum multorum

currentium in bellum

₁₀et habebant caudas similes scorpionum

et aculei in caudis earum

potestas earum nocere hominibus mensibus quinque

₁₁et habebant super se regem angelum abyssi

cui nomen hebraice Abaddon graece autem Apollyon

et latine habet nomen Exterminans

₁₂vae unum abiit ecce veniunt adhuc duo vae post haec

₁₃et sextus angelus tuba cecinit

et audivi vocem unum ex

cornibus altaris aurei

quod est ante oculos Dei

₁₄dicentem sexto angelo qui habebat tubam

solve quattuor angelos qui alligati sunt in flumine magno Eufrate

₁₅et soluti sunt quattuor angeli

qui parati erant in horam et diem et mensem et annum

ut occiderent tertiam partem hominum

₁₆et numerus equestris exercitus vicies milies dena milia

audivi numerum eorum

₁₇et ita vidi equos in visione et qui sedebant super eos

habentes loricas igneas et hyacinthinas et sulphureas

et capita equorum erant tamquam capita leonum

et de ore ipsorum procedit ignis et fumus et sulphur

₁₈ab his tribus plagis occisa est tertia pars hominum

de igne et fumo et sulphure

qui procedebat ex ore ipsorum

₁₉potestas enim equorum in ore eorum est et in caudis eorum

nam caudae illorum similes serpentibus

habentes capita

et in his nocent

₂₀et ceteri homines qui non sunt occisi in his plagis

neque paenitentiam egerunt de operibus manuum suarum

ut non adorarent daemonia

et simulacra aurea et argentea et aerea et lapidea et lignea

quae neque videre possunt neque audire neque ambulare

₂₁et non egerunt paenitentiam ab homicidiis suis

neque a veneficiis suis

neque a fornicatione sua neque a furtis suis