PSALMI IUXTA LXX 103

Benedic anima mea Domino

Domine Deus meus magnificatus es vehementer

confessionem et decorem induisti

₂amictus lumine sicut vestimento extendens caelum sicut pellem

₃qui tegis in aquis superiora eius

qui ponis nubem ascensum tuum

qui ambulas super pinnas ventorum

₄qui facis angelos tuos spiritus

et ministros tuos ignem urentem

₅qui fundasti terram super stabilitatem suam

non inclinabitur in saeculum saeculi

₆abyssus sicut vestimentum amictus eius

super montes stabunt aquae

₇ab increpatione tua fugient a voce tonitrui tui formidabunt

₈ascendunt montes et descendunt campi

in locum quem fundasti eis

₉terminum posuisti quem non transgredientur

neque convertentur operire terram

₁₀qui emittis fontes in convallibus

inter medium montium pertransibunt aquae

₁₁potabunt omnes bestiae agri expectabunt onagri in siti sua

₁₂super ea volucres caeli habitabunt

de medio petrarum dabunt vocem

₁₃rigans montes de superioribus suis

de fructu operum tuorum satiabitur terra

₁₄producens faenum iumentis et herbam servituti hominum

ut educas panem de terra

₁₅et vinum laetificat cor hominis

ut exhilaret faciem in oleo

et panis cor hominis confirmat

₁₆saturabuntur ligna campi et cedri Libani quas plantavit

₁₇illic passeres nidificabunt erodii domus dux est eorum

₁₈montes excelsi cervis petra refugium erinaciis

₁₉fecit lunam in tempora sol cognovit occasum suum

₂₀posuisti tenebras et facta est nox

in ipsa pertransibunt omnes bestiae silvae

₂₁catuli leonum rugientes ut rapiant et quaerant a Deo escam sibi

₂₂ortus est sol et congregati sunt et in cubilibus suis conlocabuntur

₂₃exibit homo ad opus suum

et ad operationem suam usque ad vesperum

₂₄quam magnificata sunt opera tua Domine

omnia in sapientia fecisti impleta est terra possessione tua

₂₅hoc mare magnum et spatiosum ※manibus:

illic reptilia quorum non est numerus animalia pusilla cum magnis

₂₆illic naves pertransibunt

draco iste quem formasti ad inludendum ei

₂₇omnia a te expectant ut des illis escam in tempore

₂₈dante te illis colligent

aperiente te manum tuam omnia implebuntur bonitate

₂₉avertente autem te faciem turbabuntur

auferes spiritum eorum et deficient et in pulverem suum revertentur

₃₀emittes spiritum tuum et creabuntur

et renovabis faciem terrae

₃₁sit gloria Domini in saeculum

laetabitur Dominus in operibus suis

₃₂qui respicit terram et facit eam tremere

qui tangit montes et fumigant

₃₃cantabo Domino in vita mea psallam Deo meo quamdiu sum

₃₄iucundum sit ei eloquium meum

ego vero delectabor in Domino

₃₅deficiant peccatores a terra et iniqui ita ut non sint

benedic anima mea Domino