PSALMI IUXTA LXX 141

₂Voce mea ad Dominum clamavi

voce mea ad Dominum deprecatus sum

₃effundo in conspectu eius deprecationem meam

tribulationem meam ante ipsum pronuntio

₄in deficiendo ex me spiritum meum et tu cognovisti semitas meas

in via hac qua ambulabam absconderunt laqueum mihi

₅considerabam ad dexteram et videbam

et non erat qui cognosceret me

periit fuga a me

et non est qui requirit animam meam

₆clamavi ad te Domine dixi tu es spes mea

portio mea in terra viventium

₇intende ad deprecationem meam quia humiliatus sum nimis

libera me a persequentibus me quia confortati sunt super me

₈educ de custodia animam meam ad confitendum nomini tuo

me expectant iusti donec retribuas mihi