PSALMI IUXTA LXX 27

Ad te Domine clamabo Deus meus ne sileas a me

nequando taceas a me et adsimilabor descendentibus in lacum

₂exaudi vocem deprecationis meae dum oro ad te

dum extollo manus meas ad templum sanctum tuum

₃ne simul tradas me cum peccatoribus

et cum operantibus iniquitatem ÷ne perdideris me:

qui loquuntur pacem cum proximo suo

mala autem sunt in cordibus eorum

₄da illis secundum opera ipsorum

et secundum nequitiam adinventionum ipsorum

secundum opera manuum eorum tribue illis

redde retributionem eorum ipsis

₅quoniam non intellexerunt opera Domini

et in opera manuum eius

destrues illos et non aedificabis eos

₆benedictus Dominus quoniam exaudivit vocem deprecationis meae

₇Dominus adiutor meus et protector meus

in ipso speravit cor meum et adiutus sum

et refloruit caro mea et ex voluntate mea confitebor ei

₈Dominus fortitudo plebis suae

et protector salvationum christi sui est

₉salvam fac plebem tuam

et benedic hereditati tuae

et rege eos et extolle eos usque in aeternum