PSALMI IUXTA LXX 28

Adferte Domino filii Dei adferte Domino filios arietum

₂adferte Domino gloriam et honorem

adferte Domino gloriam nomini eius

adorate Dominum in atrio sancto eius

₃vox Domini super aquas Deus maiestatis intonuit

Dominus super aquas multas

₄vox Domini in virtute vox Domini in magnificentia

₅vox Domini confringentis cedros

et confringet Dominus cedros Libani

₆et comminuet eas tamquam vitulum Libani

et dilectus quemadmodum filius unicornium

₇vox Domini intercidentis flammam ignis

₈vox Domini concutientis desertum

et commovebit Dominus desertum Cades

₉vox Domini praeparantis cervos et revelabit condensa

et in templo eius omnis dicet

gloriam

₁₀Dominus diluvium inhabitare facit

et sedebit Dominus rex in aeternum

₁₁Dominus virtutem populo suo dabit

Dominus benedicet populo suo in pace