PSALMI IUXTA LXX 63

₂Exaudi Deus orationem meam cum deprecor

a timore inimici eripe animam meam

₃protexisti me a conventu malignantium

a multitudine operantium iniquitatem

₄quia exacuerunt ut gladium linguas suas

intenderunt arcum rem amaram

₅ut sagittent in occultis inmaculatum

₆subito sagittabunt eum et non timebunt

firmaverunt sibi sermonem nequam

narraverunt ut absconderent laqueos

dixerunt quis videbit eos

₇scrutati sunt iniquitates defecerunt scrutantes scrutinio

accedet homo et cor altum

₈et exaltabitur Deus

sagittae parvulorum factae sunt plagae eorum

₉et infirmatae sunt contra eos linguae eorum

conturbati sunt omnes qui videbant eos

₁₀et timuit omnis homo

et adnuntiaverunt opera Dei et facta eius intellexerunt

₁₁laetabitur iustus in Domino et sperabit in eo

et laudabuntur omnes recti corde