PSALMI IUXTA LXX 64

₂Te decet hymnus Deus in Sion

et tibi reddetur votum in Hierusalem

₃exaudi orationem ad te omnis caro veniet

₄verba iniquorum praevaluerunt super nos

et impietatibus nostris tu propitiaberis

₅beatus quem elegisti et adsumpsisti inhabitabit in atriis tuis

replebimur in bonis domus tuae

sanctum est templum tuum

₆mirabile in aequitate

exaudi nos Deus salutaris noster

spes omnium finium terrae et in mari longe

₇praeparans montes in virtute tua accinctus potentia

₈qui conturbas profundum maris sonum fluctuum eius

turbabuntur gentes

₉et timebunt

qui inhabitant terminos a signis tuis

exitus matutini et vespere delectabis

₁₀visitasti terram et inebriasti eam multiplicasti locupletare eam

flumen Dei repletum est aquis

parasti cibum illorum quoniam ita est praeparatio eius

₁₁rivos eius inebria multiplica genimina eius

in stillicidiis eius laetabitur germinans

₁₂benedices coronae anni benignitatis tuae

et campi tui replebuntur ubertate

₁₃pinguescent speciosa deserti et exultatione colles accingentur

₁₄induti sunt arietes ovium et valles abundabunt frumento

clamabunt etenim hymnum dicent