PSALMI IUXTA LXX 65

Iubilate Deo omnis terra

₂psalmum dicite nomini eius date gloriam laudi eius

₃dicite Deo quam terribilia sunt opera tua Domine

in multitudine virtutis tuae mentientur tibi inimici tui

₄omnis terra adorent te et psallant tibi

psalmum dicant nomini tuo diapsalma

₅venite et videte opera Dei

terribilis in consiliis super filios hominum

₆qui convertit mare in aridam in flumine pertransibunt pede

ibi laetabimur in ipso

₇qui dominatur in virtute sua in aeternum

oculi eius super gentes respiciunt

qui exasperant non exaltentur in semet ipsis diapsalma

₈benedicite gentes Deum nostrum

et auditam facite vocem laudis eius

₉qui posuit animam meam ad vitam

et non dedit in commotionem pedes meos

₁₀quoniam probasti nos Deus

igne nos examinasti sicut examinatur argentum

₁₁induxisti nos in laqueum posuisti tribulationes in dorso nostro

₁₂inposuisti homines super capita nostra

transivimus per ignem et aquam et eduxisti nos in refrigerium

₁₃introibo in domum tuam in holocaustis

reddam tibi vota mea

₁₄quae distinxerunt labia mea

et locutum est os meum in tribulatione mea

₁₅holocausta medullata offeram tibi cum incensu arietum

offeram tibi boves cum hircis diapsalma

₁₆venite audite et narrabo omnes qui timetis Deum

quanta fecit animae meae

₁₇ad ipsum ore meo clamavi et exaltavi sub lingua mea

₁₈iniquitatem si aspexi in corde meo

non exaudiat Dominus

₁₉propterea exaudivit Deus

adtendit voci deprecationis meae

₂₀benedictus Deus qui non amovit orationem meam

et misericordiam suam a me