PSALMI IUXTA LXX 68

₂Salvum me fac Deus

quoniam intraverunt aquae usque ad animam meam

₃infixus sum in limum profundi et non est substantia

veni in altitudines maris et tempestas demersit

me

₄laboravi clamans raucae factae sunt fauces meae

defecerunt oculi mei dum spero in Deum meum

₅multiplicati sunt super capillos capitis mei qui oderunt me gratis

confortati sunt qui persecuti sunt me inimici mei iniuste

quae non rapui tunc exsolvebam

₆Deus tu scis insipientiam meam

et delicta mea a te non sunt abscondita

₇non erubescant in me qui expectant te Domine Domine virtutum

non confundantur super me qui quaerunt te Deus Israhel

₈quoniam propter te sustinui obprobrium

operuit confusio faciem meam

₉extraneus factus sum fratribus meis

et peregrinus filiis matris meae

₁₀quoniam zelus domus tuae comedit me

et obprobria exprobrantium tibi ceciderunt super me

₁₁et operui in ieiunio animam meam

et factum est in obprobrium mihi

₁₂et posui vestimentum meum cilicium

et factus sum illis in parabolam

₁₃adversum me exercebantur qui sedebant in porta

et in me psallebant qui bibebant vinum

₁₄ego vero orationem meam ad te Domine

tempus beneplaciti Deus in multitudine misericordiae tuae

exaudi me in veritate salutis tuae

₁₅eripe me de luto ut non infigar

liberer ab his qui oderunt me

et de profundis aquarum

₁₆non me demergat tempestas aquae

neque absorbeat me profundum

neque urgeat super me puteus os suum

₁₇exaudi me Domine quoniam benigna est misericordia tua

secundum multitudinem miserationum tuarum respice me

₁₈et ne avertas faciem tuam a puero tuo

quoniam tribulor velociter exaudi me

₁₉intende animae meae et libera eam

propter inimicos meos eripe me

₂₀tu scis inproperium meum

et confusionem et reverentiam meam

₂₁in conspectu tuo sunt omnes qui tribulant me

inproperium expectavit cor meum et miseriam

et sustinui qui simul contristaretur et non fuit

et qui consolaretur et non inveni

₂₂et dederunt in escam meam fel

et in siti mea potaverunt me aceto

₂₃fiat mensa eorum coram ipsis in laqueum

et in retributiones et in scandalum

₂₄obscurentur oculi eorum ne videant

et dorsum eorum semper incurva

₂₅effunde super eos iram tuam

et furor irae tuae conprehendat eos

₂₆fiat habitatio eorum deserta

et in tabernaculis eorum non sit qui inhabitet

₂₇quoniam quem tu percussisti persecuti sunt

et super dolorem vulnerum meorum addiderunt

₂₈adpone iniquitatem super iniquitatem eorum

et non intrent in iustitia tua

₂₉deleantur de libro viventium et cum iustis non scribantur

₃₀ego sum pauper et dolens

salus tua Deus suscepit me

₃₁laudabo nomen Dei cum cantico magnificabo eum in laude

₃₂et placebit Deo super vitulum novellum

cornua producentem et ungulas

₃₃videant pauperes et laetentur

quaerite Deum et vivet anima vestra

₃₄quoniam exaudivit pauperes Dominus

et vinctos suos non despexit

₃₅laudent illum caeli et terra mare et omnia reptilia in eis

₃₆quoniam Deus salvam faciet Sion

et aedificabuntur civitates Iudaeae

et inhabitabunt ibi et hereditate adquirent eam

₃₇et semen servorum eius possidebunt eam

et qui diligunt nomen eius habitabunt in ea