₁erat autem rex Salomon regnans super omnem Israhel

₂et hii principes quos habebat

Azarias filius Sadoc sacerdos

₃Helioreph et Ahia filii Sesa scribae

Iosaphat filius Ahilud a commentariis

₄Banaias filius Ioiadae super exercitum

Sadoc autem et Abiathar sacerdotes

₅Azarias filius Nathan super eos qui adsistebant regi

Zabud filius Nathan sacerdos amicus regis

₆et Ahisar praepositus domus

et Adoniram filius Abda super tributa

₇habebat autem Salomon duodecim praefectos super omnem Israhel

qui praebebant annonam regi et domui eius

per singulos enim menses in anno singuli necessaria ministrabant

₈et haec nomina eorum

Benhur in monte Ephraim

₉Bendecar in Macces

et in Salebbim et in Bethsemes et Helon

Bethanan

₁₀Benesed in Araboth ipsius erat Soccho et omnis terra Epher

₁₁Benabinadab cuius omnis Nepthad Dor Tapheth

filiam Salomonis habebat uxorem

₁₂Bana filius Ahilud regebat Thanac et Mageddo

et universam Bethsan quae est iuxta Sarthana

subter Hiezrahel a Bethsan usque Abelmeula e regione Iecmaan

₁₃Bengaber in Ramoth Galaad

habebat Avothiair filii Manasse in Galaad

ipse praeerat in omni regione Argob quae est in Basan

sexaginta civitatibus magnis atque muratis

quae habebant seras aereas

₁₄Ahinadab filius Addo praeerat in Manaim

₁₅Ahimaas in Nepthali

sed et ipse habebat Basmath filiam Salomonis in coniugio

₁₆Baana filius Usi in Aser et in Balod

₁₇Iosaphat filius Pharue in Isachar

₁₈Semei filius Hela in Beniamin

₁₉Gaber filius Uri in terra Galaad

in terra Seon regis Amorrei et Og regis Basan

super omnia quae erant in illa terra

₂₀Iuda et Israhel innumerabiles sicut harena maris in multitudine

comedentes et bibentes atque laetantes

₂₁Salomon autem erat in dicione sua habens omnia regna

sicut a flumine terrae Philisthim usque ad terminum

Aegypti

offerentium sibi munera et servientium ei cunctis diebus vitae eius

₂₂erat autem cibus Salomonis per dies singulos

triginta chori similae et sexaginta chori farinae

₂₃decem boves pingues et viginti boves pascuales et centum arietes

excepta venatione cervorum caprearum atque bubalorum et avium altilium

₂₄ipse enim obtinebat omnem regionem quae erat trans flumen

quasi a Thapsa usque Gazam

et cunctos reges illarum regionum

et habebat pacem ex omni parte in circuitu

₂₅habitabatque Iudas et Israhel absque timore ullo

unusquisque sub vite sua et sub ficu sua

a Dan usque Bersabee cunctis diebus Salomonis

₂₆et habebat Salomon quadraginta milia praesepia equorum currulium

et duodecim milia equestrium

₂₇nutriebantque eos supradicti regis praefecti

sed et necessaria mensae regis Salomonis

cum ingenti cura praebebant in tempore suo

₂₈hordeum quoque et paleas equorum et iumentorum

deferebant in locum ubi erat rex iuxta constitutum sibi

₂₉dedit quoque Deus sapientiam Salomoni

et prudentiam multam nimis

et latitudinem cordis quasi harenam quae est in litore maris

₃₀et praecedebat sapientia Salomonis sapientiam omnium

Orientalium et Aegyptiorum

₃₁et erat sapientior cunctis hominibus

sapientior Aethan Ezraita et Heman et Chalcal et Dorda filiis Maol

et erat nominatus in universis gentibus per circuitum

₃₂locutus est quoque Salomon tria milia parabolas

et fuerunt carmina eius quinque et mille

₃₃et disputavit super lignis

a cedro quae est in Libano usque ad hysopum quae egreditur de pariete

et disseruit de iumentis et volucribus et reptilibus et piscibus

₃₄et veniebant de cunctis populis ad audiendam sapientiam Salomonis

et ab universis regibus terrae qui audiebant sapientiam eius