₂Ἐν τῷ ἄρξασθαι ἀρχηγοὺς ἐν Ισραηλ,

ἐν προαιρέσει λαοῦ εὐλογεῖτε τὸν κύριον.

₃ἀκούσατε, βασιλεῖς, ἐνωτίζεσθε, σατράπαι δυνατοί·

ἐγὼ τῷ κυρίῳ ᾄσομαι,

ψαλῶ τῷ θεῷ Ισραηλ.

₄κύριε, ἐν τῇ ἐξόδῳ σου ἐκ Σηιρ,

ἐν τῷ ἀπαίρειν σε ἐξ ἀγροῦ Εδωμ

γῆ ἐσείσθη, καὶ ὁ οὐρανὸς ἐξεστάθη,

καὶ αἱ νεφέλαι ἔσταξαν ὕδωρ·

₅ὄρη ἐσαλεύθησαν ἀπὸ προσώπου κυρίου,

τοῦτο Σινα ἀπὸ προσώπου κυρίου θεοῦ Ισραηλ.

₆ἐν ἡμέραις Σαμεγαρ υἱοῦ Αναθ, ἐν ἡμέραις Ιαηλ

ἐξέλιπον βασιλεῖς καὶ ἐπορεύθησαν τρίβους,

ἐπορεύθησαν ὁδοὺς διεστραμμένας.

₇ἐξέλιπεν φραζων ἐν τῷ Ισραηλ, ἐξέλιπεν,

ἕως οὗ ἐξανέστη Δεββωρα,

ὅτι ἀνέστη μήτηρ ἐν τῷ Ισραηλ.

₈ᾁρέτισαν θεοὺς καινοὺς

ὡς ἄρτον κρίθινον·

σκέπην ἐὰν ἴδω σιρομαστῶν

ἐν τεσσαράκοντα χιλιάσιν.

₉ἡ καρδία μου ἐπὶ τὰ διατεταγμένα τῷ Ισραηλ·

οἱ δυνάσται τοῦ λαοῦ, εὐλογεῖτε τὸν κύριον.

₁₀ἐπιβεβηκότες ἐπὶ ὑποζυγίων,

καθήμενοι ἐπὶ λαμπηνῶν,

₁₁φθέγξασθε φωνὴν ἀνακρουομένων

ἀνὰ μέσον εὐφραινομένων·

ἐκεῖ δώσουσιν δικαιοσύνην κυρίῳ.

δίκαιοι ἐνίσχυσαν ἐν τῷ Ισραηλ·

τότε κατέβη εἰς τὰς πόλεις αὐτοῦ ὁ λαὸς κυρίου.

₁₂ἐξεγείρου ἐξεγείρου, Δεββωρα,

ἐξέγειρον μυριάδας μετὰ λαοῦ,

ἐξεγείρου ἐξεγείρου, λάλει μετ᾽ ᾠδῆς·

ἐνισχύων ἐξανίστασο, Βαρακ,

καὶ ἐνίσχυσον, Δεββωρα, τὸν Βαρακ·

αἰχμαλώτιζε αἰχμαλωσίαν σου, υἱὸς Αβινεεμ.

₁₃πότε ἐμεγαλύνθη ἡ ἰσχὺς αὐτοῦ;

κύριε, ταπείνωσόν μοι τοὺς ἰσχυροτέρους μου.

₁₄λαὸς Εφραιμ ἐτιμωρήσατο αὐτοὺς

ἐν κοιλάδι ἀδελφοῦ σου Βενιαμιν ἐν λαοῖς σου.

ἐξ ἐμοῦ Μαχιρ κατέβησαν ἐξερευνῶντες,

καὶ ἐκ Ζαβουλων κύριος ἐπολέμει μοι ἐν δυνατοῖς

ἐκεῖθεν ἐν σκήπτρῳ ἐνισχύοντος ἡγήσεως.

₁₅ἐν Ισσαχαρ μετὰ Δεββωρας

ἐξαπέστειλεν πεζοὺς αὐτοῦ εἰς τὴν κοιλάδα.

ἵνα τί σὺ κατοικεῖς ἐν μέσῳ χειλέων;

ἐξέτεινεν ἐν τοῖς ποσὶν αὐτοῦ.

ἐν διαιρέσεσιν Ρουβην

μεγάλοι ἀκριβασμοὶ καρδίας.

₁₆ἵνα τί μοι κάθησαι ἀνὰ μέσον τῶν μοσφαθαιμ

τοῦ εἰσακούειν συρισμοὺς ἐξεγειρόντων;

τοῦ διελθεῖν εἰς τὰ τοῦ Ρουβην

μεγάλοι ἐξιχνιασμοὶ καρδίας.

₁₇Γαλααδ ἐν τῷ πέραν τοῦ Ιορδάνου κατεσκήνωσεν·

καὶ Δαν ἵνα τί παροικεῖ πλοίοις;

Ασηρ παρῴκησεν παρ᾽ αἰγιαλὸν θαλασσῶν

καὶ ἐπὶ τὰς διακοπὰς αὐτοῦ κατεσκήνωσεν.

₁₈Ζαβουλων λαὸς ὀνειδίσας ψυχὴν αὐτοῦ εἰς θάνατον

καὶ Νεφθαλιμ ἐπὶ ὕψη ἀγροῦ.

₁₉ἦλθον βασιλεῖς καὶ παρετάξαντο.

τότε ἐπολέμησαν βασιλεῖς Χανααν

ἐν Θενναχ ἐπὶ ὕδατος Μαγεδδω·

πλεονεξίαν ἀργυρίου οὐκ ἔλαβον.

₂₀ἐκ τοῦ οὐρανοῦ ἐπολέμησαν ἀστέρες,

ἐκ τῆς τάξεως αὐτῶν ἐπολέμησαν μετὰ Σισαρα.

₂₁χειμάρρους Κισων ἐξέβαλεν αὐτούς,

χειμάρρους καδημιμ, χειμάρρους Κισων·

καταπατήσει αὐτοὺς ψυχή μου δυνατή.

₂₂τότε ἀπεκόπησαν πτέρναι ἵππου,

αμαδαρωθ δυνατῶν αὐτοῦ.

₂₃καταράσασθε Μαρωζ, εἶπεν ὁ ἄγγελος κυρίου,

καταράσει καταράσασθε τοὺς ἐνοίκους αὐτῆς,

ὅτι οὐκ ἤλθοσαν εἰς τὴν βοήθειαν κυρίου·

βοηθὸς ἡμῶν κύριος ἐν μαχηταῖς δυνατός.

₂₄εὐλογηθείη ἐκ γυναικῶν Ιαηλ

γυνὴ Χαβερ τοῦ Κιναίου,

ἐκ γυναικῶν ἐν σκηνῇ εὐλογηθείη.

₂₅ὕδωρ ᾔτησεν αὐτήν, καὶ γάλα ἔδωκεν αὐτῷ,

ἐν λακάνῃ ἰσχυρῶν προσήγγισεν βούτυρον.

₂₆τὴν χεῖρα αὐτῆς τὴν ἀριστερὰν εἰς πάσσαλον ἐξέτεινεν,

τὴν δεξιὰν αὐτῆς εἰς ἀποτομὰς κατακόπων

καὶ ἀπέτεμεν Σισαρα, ἀπέτριψεν τὴν κεφαλὴν αὐτοῦ

καὶ συνέθλασεν καὶ διήλασεν τὴν γνάθον αὐτοῦ.

₂₇ἀνὰ μέσον τῶν ποδῶν αὐτῆς συγκάμψας ἔπεσεν,

ἐκοιμήθη μεταξὺ ποδῶν αὐτῆς·

ἐν ᾧ ἔκαμψεν, ἐκεῖ ἔπεσεν ταλαίπωρος.

₂₈διὰ τῆς θυρίδος διέκυπτεν ἡ μήτηρ Σισαρα

διὰ τῆς δικτυωτῆς ἐπιβλέπουσα ἐπὶ τοὺς μεταστρέφοντας μετὰ Σισαρα

Διὰ τί ἠσχάτισεν τὸ ἅρμα αὐτοῦ παραγενέσθαι;

διὰ τί ἐχρόνισαν ἴχνη ἁρμάτων αὐτοῦ;

₂₉σοφαὶ ἀρχουσῶν αὐτῆς ἀνταπεκρίναντο πρὸς αὐτήν,

καὶ αὐτὴ ἀπεκρίνατο ἐν ῥήμασιν αὐτῆς

₃₀Οὐχὶ εὑρήσουσιν αὐτὸν διαμερίζοντα σκῦλα;

φιλιάζων φίλοις εἰς κεφαλὴν δυνατοῦ·

σκῦλα βαμμάτων Σισαρα,

σκῦλα βαμμάτων ποικιλίας,

βαφὴ ποικίλων περὶ τράχηλον αὐτοῦ σκῦλον.

₃₁οὕτως ἀπόλοιντο πάντες οἱ ἐχθροί σου, κύριε·

καὶ οἱ ἀγαπῶντες αὐτὸν καθὼς ἡ ἀνατολὴ τοῦ ἡλίου ἐν δυναστείαις αὐτοῦ. Καὶ ἡσύχασεν ἡ γῆ τεσσαράκοντα ἔτη.