Ἐξομολογεῖσθε τῷ κυρίῳ καὶ ἐπικαλεῖσθε τὸ ὄνομα αὐτοῦ,

ἀπαγγείλατε ἐν τοῖς ἔθνεσιν τὰ ἔργα αὐτοῦ·

₂ᾄσατε αὐτῷ καὶ ψάλατε αὐτῷ,

διηγήσασθε πάντα τὰ θαυμάσια αὐτοῦ.

₃ἐπαινεῖσθε ἐν τῷ ὀνόματι τῷ ἁγίῳ αὐτοῦ,

εὐφρανθήτω καρδία ζητούντων τὸν κύριον·

₄ζητήσατε τὸν κύριον καὶ κραταιώθητε,

ζητήσατε τὸ πρόσωπον αὐτοῦ διὰ παντός.

₅μνήσθητε τῶν θαυμασίων αὐτοῦ, ὧν ἐποίησεν,

τὰ τέρατα αὐτοῦ καὶ τὰ κρίματα τοῦ στόματος αὐτοῦ,

₆σπέρμα Αβρααμ δοῦλοι αὐτοῦ,

υἱοὶ Ιακωβ ἐκλεκτοὶ αὐτοῦ.

₇αὐτὸς κύριος ὁ θεὸς ἡμῶν,

ἐν πάσῃ τῇ γῇ τὰ κρίματα αὐτοῦ.

₈ἐμνήσθη εἰς τὸν αἰῶνα διαθήκης αὐτοῦ,

λόγου, οὗ ἐνετείλατο εἰς χιλίας γενεάς,

₉ὃν διέθετο τῷ Αβρααμ,

καὶ τοῦ ὅρκου αὐτοῦ τῷ Ισαακ

₁₀καὶ ἔστησεν αὐτὴν τῷ Ιακωβ εἰς πρόσταγμα

καὶ τῷ Ισραηλ διαθήκην αἰώνιον

₁₁λέγων Σοὶ δώσω τὴν γῆν Χανααν

σχοίνισμα κληρονομίας ὑμῶν.

₁₂ἐν τῷ εἶναι αὐτοὺς ἀριθμῷ βραχεῖς,

ὀλιγοστοὺς καὶ παροίκους ἐν αὐτῇ

₁₃καὶ διῆλθον ἐξ ἔθνους εἰς ἔθνος,

ἐκ βασιλείας εἰς λαὸν ἕτερον·

₁₄οὐκ ἀφῆκεν ἄνθρωπον ἀδικῆσαι αὐτοὺς

καὶ ἤλεγξεν ὑπὲρ αὐτῶν βασιλεῖς

₁₅Μὴ ἅπτεσθε τῶν χριστῶν μου

καὶ ἐν τοῖς προφήταις μου μὴ πονηρεύεσθε.

₁₆καὶ ἐκάλεσεν λιμὸν ἐπὶ τὴν γῆν,

πᾶν στήριγμα ἄρτου συνέτριψεν·

₁₇ἀπέστειλεν ἔμπροσθεν αὐτῶν ἄνθρωπον,

εἰς δοῦλον ἐπράθη Ιωσηφ.

₁₈ἐταπείνωσαν ἐν πέδαις τοὺς πόδας αὐτοῦ,

σίδηρον διῆλθεν ἡ ψυχὴ αὐτοῦ

₁₉μέχρι τοῦ ἐλθεῖν τὸν λόγον αὐτοῦ,

τὸ λόγιον κυρίου ἐπύρωσεν αὐτόν.

₂₀ἀπέστειλεν βασιλεὺς καὶ ἔλυσεν αὐτόν,

ἄρχων λαῶν, καὶ ἀφῆκεν αὐτόν·

₂₁κατέστησεν αὐτὸν κύριον τοῦ οἴκου αὐτοῦ

καὶ ἄρχοντα πάσης τῆς κτήσεως αὐτοῦ

₂₂τοῦ παιδεῦσαι τοὺς ἄρχοντας αὐτοῦ ὡς ἑαυτὸν

καὶ τοὺς πρεσβυτέρους αὐτοῦ σοφίσαι.

₂₃καὶ εἰσῆλθεν Ισραηλ εἰς Αἴγυπτον,

καὶ Ιακωβ παρῴκησεν ἐν γῇ Χαμ·

₂₄καὶ ηὔξησεν τὸν λαὸν αὐτοῦ σφόδρα

καὶ ἐκραταίωσεν αὐτὸν ὑπὲρ τοὺς ἐχθροὺς αὐτοῦ.

₂₅μετέστρεψεν τὴν καρδίαν αὐτῶν τοῦ μισῆσαι τὸν λαὸν αὐτοῦ,

τοῦ δολιοῦσθαι ἐν τοῖς δούλοις αὐτοῦ.

₂₆ἐξαπέστειλεν Μωυσῆν τὸν δοῦλον αὐτοῦ,

Ααρων, ὃν ἐξελέξατο αὐτόν·

₂₇ἔθετο ἐν αὐτοῖς τοὺς λόγους τῶν σημείων αὐτοῦ

καὶ τῶν τεράτων ἐν γῇ Χαμ.

₂₈ἐξαπέστειλεν σκότος, καὶ ἐσκότασεν,

καὶ παρεπίκραναν τοὺς λόγους αὐτοῦ.

₂₉μετέστρεψεν τὰ ὕδατα αὐτῶν εἰς αἷμα

καὶ ἀπέκτεινεν τοὺς ἰχθύας αὐτῶν.

₃₀ἐξῆρψεν ἡ γῆ αὐτῶν βατράχους

ἐν τοῖς ταμιείοις τῶν βασιλέων αὐτῶν.

₃₁εἶπεν, καὶ ἦλθεν κυνόμυια

καὶ σκνῖπες ἐν πᾶσι τοῖς ὁρίοις αὐτῶν.

₃₂ἔθετο τὰς βροχὰς αὐτῶν χάλαζαν,

πῦρ καταφλέγον ἐν τῇ γῇ αὐτῶν,

₃₃καὶ ἐπάταξεν τὰς ἀμπέλους αὐτῶν καὶ τὰς συκᾶς αὐτῶν

καὶ συνέτριψεν πᾶν ξύλον ὁρίου αὐτῶν.

₃₄εἶπεν, καὶ ἦλθεν ἀκρὶς

καὶ βροῦχος, οὗ οὐκ ἦν ἀριθμός,

₃₅καὶ κατέφαγεν πάντα τὸν χόρτον ἐν τῇ γῇ αὐτῶν

καὶ κατέφαγεν τὸν καρπὸν τῆς γῆς αὐτῶν.

₃₆καὶ ἐπάταξεν πᾶν πρωτότοκον ἐν τῇ γῇ αὐτῶν,

ἀπαρχὴν παντὸς πόνου αὐτῶν,

₃₇καὶ ἐξήγαγεν αὐτοὺς ἐν ἀργυρίῳ καὶ χρυσίῳ

καὶ οὐκ ἦν ἐν ταῖς φυλαῖς αὐτῶν ἀσθενῶν.

₃₈εὐφράνθη Αἴγυπτος ἐν τῇ ἐξόδῳ αὐτῶν,

ὅτι ἐπέπεσεν ὁ φόβος αὐτῶν ἐπ᾽ αὐτούς.

₃₉διεπέτασεν νεφέλην εἰς σκέπην αὐτοῖς

καὶ πῦρ τοῦ φωτίσαι αὐτοῖς τὴν νύκτα.

₄₀ᾔτησαν, καὶ ἦλθεν ὀρτυγομήτρα,

καὶ ἄρτον οὐρανοῦ ἐνέπλησεν αὐτούς·

₄₁διέρρηξεν πέτραν, καὶ ἐρρύησαν ὕδατα,

ἐπορεύθησαν ἐν ἀνύδροις ποταμοί.

₄₂ὅτι ἐμνήσθη τοῦ λόγου τοῦ ἁγίου αὐτοῦ

τοῦ πρὸς Αβρααμ τὸν δοῦλον αὐτοῦ

₄₃καὶ ἐξήγαγεν τὸν λαὸν αὐτοῦ ἐν ἀγαλλιάσει

καὶ τοὺς ἐκλεκτοὺς αὐτοῦ ἐν εὐφροσύνῃ.

₄₄καὶ ἔδωκεν αὐτοῖς χώρας ἐθνῶν,

καὶ πόνους λαῶν ἐκληρονόμησαν,

₄₅ὅπως ἂν φυλάξωσιν τὰ δικαιώματα αὐτοῦ

καὶ τὸν νόμον αὐτοῦ ἐκζητήσωσιν.