Προσέχετε, λαός μου, τὸν νόμον μου,

κλίνατε τὸ οὖς ὑμῶν εἰς τὰ ῥήματα τοῦ στόματός μου·

₂ἀνοίξω ἐν παραβολαῖς τὸ στόμα μου,

φθέγξομαι προβλήματα ἀπ᾽ ἀρχῆς.

₃ὅσα ἠκούσαμεν καὶ ἔγνωμεν αὐτὰ

καὶ οἱ πατέρες ἡμῶν διηγήσαντο ἡμῖν,

₄οὐκ ἐκρύβη ἀπὸ τῶν τέκνων αὐτῶν εἰς γενεὰν ἑτέραν

ἀπαγγέλλοντες τὰς αἰνέσεις τοῦ κυρίου

καὶ τὰς δυναστείας αὐτοῦ

καὶ τὰ θαυμάσια αὐτοῦ, ἃ ἐποίησεν.

₅καὶ ἀνέστησεν μαρτύριον ἐν Ιακωβ

καὶ νόμον ἔθετο ἐν Ισραηλ,

ὅσα ἐνετείλατο τοῖς πατράσιν ἡμῶν

τοῦ γνωρίσαι αὐτὰ τοῖς υἱοῖς αὐτῶν,

₆ὅπως ἂν γνῷ γενεὰ ἑτέρα,

υἱοὶ οἱ τεχθησόμενοι,

καὶ ἀναστήσονται καὶ ἀπαγγελοῦσιν αὐτὰ τοῖς υἱοῖς αὐτῶν,

₇ἵνα θῶνται ἐπὶ τὸν θεὸν τὴν ἐλπίδα αὐτῶν

καὶ μὴ ἐπιλάθωνται τῶν ἔργων τοῦ θεοῦ

καὶ τὰς ἐντολὰς αὐτοῦ ἐκζητήσουσιν,

₈ἵνα μὴ γένωνται ὡς οἱ πατέρες αὐτῶν

γενεὰ σκολιὰ καὶ παραπικραίνουσα,

γενεά, ἥτις οὐ κατηύθυνεν τὴν καρδίαν αὐτῆς

καὶ οὐκ ἐπιστώθη μετὰ τοῦ θεοῦ τὸ πνεῦμα αὐτῆς.

₉υἱοὶ Εφραιμ ἐντείνοντες καὶ βάλλοντες τόξοις

ἐστράφησαν ἐν ἡμέρᾳ πολέμου.

₁₀οὐκ ἐφύλαξαν τὴν διαθήκην τοῦ θεοῦ

καὶ ἐν τῷ νόμῳ αὐτοῦ οὐκ ἤθελον πορεύεσθαι

₁₁καὶ ἐπελάθοντο τῶν εὐεργεσιῶν αὐτοῦ

καὶ τῶν θαυμασίων αὐτοῦ, ὧν ἔδειξεν αὐτοῖς,

₁₂ἐναντίον τῶν πατέρων αὐτῶν ἃ ἐποίησεν θαυμάσια

ἐν γῇ Αἰγύπτῳ ἐν πεδίῳ Τάνεως.

₁₃διέρρηξεν θάλασσαν καὶ διήγαγεν αὐτούς,

ἔστησεν ὕδατα ὡσεὶ ἀσκὸν

₁₄καὶ ὡδήγησεν αὐτοὺς ἐν νεφέλῃ ἡμέρας

καὶ ὅλην τὴν νύκτα ἐν φωτισμῷ πυρός.

₁₅διέρρηξεν πέτραν ἐν ἐρήμῳ

καὶ ἐπότισεν αὐτοὺς ὡς ἐν ἀβύσσῳ πολλῇ

₁₆καὶ ἐξήγαγεν ὕδωρ ἐκ πέτρας

καὶ κατήγαγεν ὡς ποταμοὺς ὕδατα.

₁₇καὶ προσέθεντο ἔτι τοῦ ἁμαρτάνειν αὐτῷ,

παρεπίκραναν τὸν ὕψιστον ἐν ἀνύδρῳ

₁₈καὶ ἐξεπείρασαν τὸν θεὸν ἐν ταῖς καρδίαις αὐτῶν

τοῦ αἰτῆσαι βρώματα ταῖς ψυχαῖς αὐτῶν

₁₉καὶ κατελάλησαν τοῦ θεοῦ καὶ εἶπαν

Μὴ δυνήσεται ὁ θεὸς ἑτοιμάσαι τράπεζαν ἐν ἐρήμῳ;

₂₀ἐπεὶ ἐπάταξεν πέτραν καὶ ἐρρύησαν ὕδατα

καὶ χείμαρροι κατεκλύσθησαν,

μὴ καὶ ἄρτον δύναται δοῦναι

ἢ ἑτοιμάσαι τράπεζαν τῷ λαῷ αὐτοῦ;

₂₁διὰ τοῦτο ἤκουσεν κύριος καὶ ἀνεβάλετο,

καὶ πῦρ ἀνήφθη ἐν Ιακωβ,

καὶ ὀργὴ ἀνέβη ἐπὶ τὸν Ισραηλ,

₂₂ὅτι οὐκ ἐπίστευσαν ἐν τῷ θεῷ

οὐδὲ ἤλπισαν ἐπὶ τὸ σωτήριον αὐτοῦ.

₂₃καὶ ἐνετείλατο νεφέλαις ὑπεράνωθεν

καὶ θύρας οὐρανοῦ ἀνέῳξεν

₂₄καὶ ἔβρεξεν αὐτοῖς μαννα φαγεῖν

καὶ ἄρτον οὐρανοῦ ἔδωκεν αὐτοῖς·

₂₅ἄρτον ἀγγέλων ἔφαγεν ἄνθρωπος,

ἐπισιτισμὸν ἀπέστειλεν αὐτοῖς εἰς πλησμονήν.

₂₆ἀπῆρεν νότον ἐξ οὐρανοῦ

καὶ ἐπήγαγεν ἐν τῇ δυναστείᾳ αὐτοῦ λίβα

₂₇καὶ ἔβρεξεν ἐπ᾽ αὐτοὺς ὡσεὶ χοῦν σάρκας

καὶ ὡσεὶ ἄμμον θαλασσῶν πετεινὰ πτερωτά,

₂₈καὶ ἐπέπεσον εἰς μέσον τῆς παρεμβολῆς αὐτῶν

κύκλῳ τῶν σκηνωμάτων αὐτῶν,

₂₉καὶ ἐφάγοσαν καὶ ἐνεπλήσθησαν σφόδρα,

καὶ τὴν ἐπιθυμίαν αὐτῶν ἤνεγκεν αὐτοῖς,

₃₀οὐκ ἐστερήθησαν ἀπὸ τῆς ἐπιθυμίας αὐτῶν.

ἔτι τῆς βρώσεως αὐτῶν οὔσης ἐν τῷ στόματι αὐτῶν

₃₁καὶ ὀργὴ τοῦ θεοῦ ἀνέβη ἐπ᾽ αὐτοὺς

καὶ ἀπέκτεινεν ἐν τοῖς πίοσιν αὐτῶν

καὶ τοὺς ἐκλεκτοὺς τοῦ Ισραηλ συνεπόδισεν.

₃₂ἐν πᾶσιν τούτοις ἥμαρτον ἔτι

καὶ οὐκ ἐπίστευσαν ἐν τοῖς θαυμασίοις αὐτοῦ,

₃₃καὶ ἐξέλιπον ἐν ματαιότητι αἱ ἡμέραι αὐτῶν

καὶ τὰ ἔτη αὐτῶν μετὰ σπουδῆς.

₃₄ὅταν ἀπέκτεννεν αὐτούς, ἐξεζήτουν αὐτὸν

καὶ ἐπέστρεφον καὶ ὤρθριζον πρὸς τὸν θεὸν

₃₅καὶ ἐμνήσθησαν ὅτι ὁ θεὸς βοηθὸς αὐτῶν ἐστιν

καὶ ὁ θεὸς ὁ ὕψιστος λυτρωτὴς αὐτῶν ἐστιν.

₃₆καὶ ἠπάτησαν αὐτὸν ἐν τῷ στόματι αὐτῶν

καὶ τῇ γλώσσῃ αὐτῶν ἐψεύσαντο αὐτῷ,

₃₇ἡ δὲ καρδία αὐτῶν οὐκ εὐθεῖα μετ᾽ αὐτοῦ,

οὐδὲ ἐπιστώθησαν ἐν τῇ διαθήκῃ αὐτοῦ.

₃₈αὐτὸς δέ ἐστιν οἰκτίρμων

καὶ ἱλάσεται ταῖς ἁμαρτίαις αὐτῶν καὶ οὐ διαφθερεῖ

καὶ πληθυνεῖ τοῦ ἀποστρέψαι τὸν θυμὸν αὐτοῦ

καὶ οὐχὶ ἐκκαύσει πᾶσαν τὴν ὀργὴν αὐτοῦ·

₃₉καὶ ἐμνήσθη ὅτι σάρξ εἰσιν,

πνεῦμα πορευόμενον καὶ οὐκ ἐπιστρέφον.

₄₀ποσάκις παρεπίκραναν αὐτὸν ἐν τῇ ἐρήμῳ,

παρώργισαν αὐτὸν ἐν γῇ ἀνύδρῳ;

₄₁καὶ ἐπέστρεψαν καὶ ἐπείρασαν τὸν θεὸν

καὶ τὸν ἅγιον τοῦ Ισραηλ παρώξυναν.

₄₂οὐκ ἐμνήσθησαν τῆς χειρὸς αὐτοῦ,

ἡμέρας, ἧς ἐλυτρώσατο αὐτοὺς ἐκ χειρὸς θλίβοντος,

₄₃ὡς ἔθετο ἐν Αἰγύπτῳ τὰ σημεῖα αὐτοῦ

καὶ τὰ τέρατα αὐτοῦ ἐν πεδίῳ Τάνεως·

₄₄καὶ μετέστρεψεν εἰς αἷμα τοὺς ποταμοὺς αὐτῶν

καὶ τὰ ὀμβρήματα αὐτῶν, ὅπως μὴ πίωσιν·

₄₅ἐξαπέστειλεν εἰς αὐτοὺς κυνόμυιαν, καὶ κατέφαγεν αὐτούς,

καὶ βάτραχον, καὶ διέφθειρεν αὐτούς·

₄₆καὶ ἔδωκεν τῇ ἐρυσίβῃ τὸν καρπὸν αὐτῶν

καὶ τοὺς πόνους αὐτῶν τῇ ἀκρίδι·

₄₇ἀπέκτεινεν ἐν χαλάζῃ τὴν ἄμπελον αὐτῶν

καὶ τὰς συκαμίνους αὐτῶν ἐν τῇ πάχνῃ·

₄₈καὶ παρέδωκεν εἰς χάλαζαν τὰ κτήνη αὐτῶν

καὶ τὴν ὕπαρξιν αὐτῶν τῷ πυρί·

₄₉ἐξαπέστειλεν εἰς αὐτοὺς ὀργὴν θυμοῦ αὐτοῦ,

θυμὸν καὶ ὀργὴν καὶ θλῖψιν,

ἀποστολὴν δι᾽ ἀγγέλων πονηρῶν·

₅₀ὡδοποίησεν τρίβον τῇ ὀργῇ αὐτοῦ,

οὐκ ἐφείσατο ἀπὸ θανάτου τῶν ψυχῶν αὐτῶν

καὶ τὰ κτήνη αὐτῶν εἰς θάνατον συνέκλεισεν

₅₁καὶ ἐπάταξεν πᾶν πρωτότοκον ἐν Αἰγύπτῳ,

ἀπαρχὴν τῶν πόνων αὐτῶν ἐν τοῖς σκηνώμασι Χαμ.

₅₂καὶ ἀπῆρεν ὡς πρόβατα τὸν λαὸν αὐτοῦ

καὶ ἀνήγαγεν αὐτοὺς ὡς ποίμνιον ἐν ἐρήμῳ

₅₃καὶ ὡδήγησεν αὐτοὺς ἐν ἐλπίδι, καὶ οὐκ ἐδειλίασαν,

καὶ τοὺς ἐχθροὺς αὐτῶν ἐκάλυψεν θάλασσα.

₅₄καὶ εἰσήγαγεν αὐτοὺς εἰς ὅριον ἁγιάσματος αὐτοῦ,

ὄρος τοῦτο, ὃ ἐκτήσατο ἡ δεξιὰ αὐτοῦ,

₅₅καὶ ἐξέβαλεν ἀπὸ προσώπου αὐτῶν ἔθνη

καὶ ἐκληροδότησεν αὐτοὺς ἐν σχοινίῳ κληροδοσίας

καὶ κατεσκήνωσεν ἐν τοῖς σκηνώμασιν αὐτῶν τὰς φυλὰς τοῦ Ισραηλ.

₅₆καὶ ἐπείρασαν καὶ παρεπίκραναν τὸν θεὸν τὸν ὕψιστον

καὶ τὰ μαρτύρια αὐτοῦ οὐκ ἐφυλάξαντο

₅₇καὶ ἀπέστρεψαν καὶ ἠσυνθέτησαν καθὼς καὶ οἱ πατέρες αὐτῶν

καὶ μετεστράφησαν εἰς τόξον στρεβλὸν

₅₈καὶ παρώργισαν αὐτὸν ἐν τοῖς βουνοῖς αὐτῶν

καὶ ἐν τοῖς γλυπτοῖς αὐτῶν παρεζήλωσαν αὐτόν.

₅₉ἤκουσεν ὁ θεὸς καὶ ὑπερεῖδεν

καὶ ἐξουδένωσεν σφόδρα τὸν Ισραηλ

₆₀καὶ ἀπώσατο τὴν σκηνὴν Σηλωμ,

σκήνωμα αὐτοῦ, οὗ κατεσκήνωσεν ἐν ἀνθρώποις.

₆₁καὶ παρέδωκεν εἰς αἰχμαλωσίαν τὴν ἰσχὺν αὐτῶν

καὶ τὴν καλλονὴν αὐτῶν εἰς χεῖρας ἐχθροῦ

₆₂καὶ συνέκλεισεν εἰς ῥομφαίαν τὸν λαὸν αὐτοῦ

καὶ τὴν κληρονομίαν αὐτοῦ ὑπερεῖδεν.

₆₃τοὺς νεανίσκους αὐτῶν κατέφαγεν πῦρ,

καὶ αἱ παρθένοι αὐτῶν οὐκ ἐπενθήθησαν·

₆₄οἱ ἱερεῖς αὐτῶν ἐν ῥομφαίᾳ ἔπεσαν,

καὶ αἱ χῆραι αὐτῶν οὐ κλαυσθήσονται.

₆₅καὶ ἐξηγέρθη ὡς ὁ ὑπνῶν κύριος,

ὡς δυνατὸς κεκραιπαληκὼς ἐξ οἴνου,

₆₆καὶ ἐπάταξεν τοὺς ἐχθροὺς αὐτοῦ εἰς τὰ ὀπίσω

ὄνειδος αἰώνιον ἔδωκεν αὐτοῖς.

₆₇καὶ ἀπώσατο τὸ σκήνωμα Ιωσηφ

καὶ τὴν φυλὴν Εφραιμ οὐκ ἐξελέξατο·

₆₈καὶ ἐξελέξατο τὴν φυλὴν Ιουδα,

τὸ ὄρος τὸ Σιων, ὃ ἠγάπησεν,

₆₉καὶ ᾠκοδόμησεν ὡς μονοκερώτων τὸ ἁγίασμα αὐτοῦ,

ἐν τῇ γῇ ἐθεμελίωσεν αὐτὴν εἰς τὸν αἰῶνα.

₇₀καὶ ἐξελέξατο Δαυιδ τὸν δοῦλον αὐτοῦ

καὶ ἀνέλαβεν αὐτὸν ἐκ τῶν ποιμνίων τῶν προβάτων,

₇₁ἐξόπισθεν τῶν λοχευομένων ἔλαβεν αὐτὸν

ποιμαίνειν Ιακωβ τὸν λαὸν αὐτοῦ

καὶ Ισραηλ τὴν κληρονομίαν αὐτοῦ,

₇₂καὶ ἐποίμανεν αὐτοὺς ἐν τῇ ἀκακίᾳ τῆς καρδίας αὐτοῦ

καὶ ἐν ταῖς συνέσεσι τῶν χειρῶν αὐτοῦ ὡδήγησεν αὐτούς.