₂Ὁ ποιμαίνων τὸν Ισραηλ, πρόσχες,

ὁ ὁδηγῶν ὡσεὶ πρόβατα τὸν Ιωσηφ,

ὁ καθήμενος ἐπὶ τῶν χερουβιν, ἐμφάνηθι.

₃ἐναντίον Εφραιμ καὶ Βενιαμιν καὶ Μανασση

ἐξέγειρον τὴν δυναστείαν σου

καὶ ἐλθὲ εἰς τὸ σῶσαι ἡμᾶς.

₄ὁ θεός, ἐπίστρεψον ἡμᾶς καὶ

ἐπίφανον τὸ πρόσωπόν σου, καὶ σωθησόμεθα.

₅κύριε ὁ θεὸς τῶν δυνάμεων,

ἕως πότε ὀργίζῃ ἐπὶ τὴν προσευχὴν τοῦ δούλου σου,

₆ψωμιεῖς ἡμᾶς ἄρτον δακρύων

καὶ ποτιεῖς ἡμᾶς ἐν δάκρυσιν ἐν μέτρῳ;

₇ἔθου ἡμᾶς εἰς ἀντιλογίαν τοῖς γείτοσιν ἡμῶν,

καὶ οἱ ἐχθροὶ ἡμῶν ἐμυκτήρισαν ἡμᾶς.

₈κύριε ὁ θεὸς τῶν δυνάμεων, ἐπίστρεψον ἡμᾶς

καὶ ἐπίφανον τὸ πρόσωπόν σου, καὶ σωθησόμεθα.

διάψαλμα.

₉ἄμπελον ἐξ Αἰγύπτου μετῆρας,

ἐξέβαλες ἔθνη καὶ κατεφύτευσας αὐτήν·

₁₀ὡδοποίησας ἔμπροσθεν αὐτῆς

καὶ κατεφύτευσας τὰς ῥίζας αὐτῆς, καὶ ἐπλήσθη ἡ γῆ.

₁₁ἐκάλυψεν ὄρη ἡ σκιὰ αὐτῆς

καὶ αἱ ἀναδενδράδες αὐτῆς τὰς κέδρους τοῦ θεοῦ·

₁₂ἐξέτεινεν τὰ κλήματα αὐτῆς ἕως θαλάσσης

καὶ ἕως ποταμοῦ τὰς παραφυάδας αὐτῆς.

₁₃ἵνα τί καθεῖλες τὸν φραγμὸν αὐτῆς

καὶ τρυγῶσιν αὐτὴν πάντες οἱ παραπορευόμενοι τὴν ὁδόν;

₁₄ἐλυμήνατο αὐτὴν σῦς ἐκ δρυμοῦ,

καὶ μονιὸς ἄγριος κατενεμήσατο αὐτήν.

₁₅ὁ θεὸς τῶν δυνάμεων, ἐπίστρεψον δή,

ἐπίβλεψον ἐξ οὐρανοῦ καὶ ἰδὲ

καὶ ἐπίσκεψαι τὴν ἄμπελον ταύτην

₁₆καὶ κατάρτισαι αὐτήν, ἣν ἐφύτευσεν ἡ δεξιά σου,

καὶ ἐπὶ υἱὸν ἀνθρώπου, ὃν ἐκραταίωσας σεαυτῷ.

₁₇ἐμπεπυρισμένη πυρὶ καὶ ἀνεσκαμμένη·

ἀπὸ ἐπιτιμήσεως τοῦ προσώπου σου ἀπολοῦνται.

₁₈γενηθήτω ἡ χείρ σου ἐπ᾽ ἄνδρα δεξιᾶς σου

καὶ ἐπὶ υἱὸν ἀνθρώπου, ὃν ἐκραταίωσας σεαυτῷ·

₁₉καὶ οὐ μὴ ἀποστῶμεν ἀπὸ σοῦ,

ζωώσεις ἡμᾶς, καὶ τὸ ὄνομά σου ἐπικαλεσόμεθα.

₂₀κύριε ὁ θεὸς τῶν δυνάμεων, ἐπίστρεψον ἡμᾶς

καὶ ἐπίφανον τὸ πρόσωπόν σου, καὶ σωθησόμεθα.