EPISTULA IOHANNIS I 3

₁videte qualem caritatem dedit nobis Pater

ut filii Dei nominemur et sumus

propter hoc mundus non novit nos quia non novit eum

₂carissimi nunc filii Dei sumus et nondum apparuit quid erimus

scimus quoniam cum apparuerit similes ei erimus

quoniam videbimus eum sicuti est

₃et omnis qui habet spem hanc in eo sanctificat se

sicut et ille sanctus est

₄omnis qui facit peccatum et iniquitatem facit

et peccatum est iniquitas

₅et scitis quoniam ille apparuit

ut peccata tolleret

et peccatum in eo non est

₆omnis qui in eo manet non peccat

omnis qui peccat non vidit eum nec cognovit

eum

₇filioli nemo vos seducat

qui facit iustitiam iustus est sicut et ille iustus est

₈qui facit peccatum ex diabolo est

quoniam ab initio diabolus peccat

in hoc apparuit Filius Dei ut dissolvat opera diaboli

₉omnis qui natus est ex Deo peccatum non facit

quoniam semen ipsius in eo manet

et non potest peccare quoniam ex Deo natus est

₁₀in hoc manifesti sunt filii Dei et filii diaboli

omnis qui non est iustus non est de Deo

et qui non diligit fratrem suum

₁₁quoniam haec est adnuntiatio quam audistis ab initio

ut diligamus alterutrum

₁₂non sicut Cain ex maligno erat et occidit fratrem suum

et propter quid occidit eum

quoniam opera eius maligna erant fratris autem eius iusta

₁₃nolite mirari fratres si odit vos mundus

₁₄nos scimus quoniam translati sumus de morte in vitam

quoniam diligimus fratres

qui non diligit manet in morte

₁₅omnis qui odit fratrem suum homicida est

et scitis quoniam omnis homicida non habet vitam aeternam in se manentem

₁₆in hoc cognovimus caritatem

quoniam ille pro nobis animam suam posuit

et nos debemus pro fratribus animas ponere

₁₇qui habuerit substantiam mundi

et viderit fratrem suum necesse habere

et clauserit viscera sua ab eo

quomodo caritas Dei manet in eo

₁₈filioli non diligamus verbo nec

lingua

sed opere et veritate

₁₉in hoc cognoscimus quoniam ex veritate sumus

et in conspectu eius suadeamus corda nostra

₂₀quoniam si reprehenderit nos cor

maior est Deus corde nostro et novit omnia

₂₁carissimi si cor non reprehenderit nos

fiduciam habemus ad Deum

₂₂et quodcumque petierimus accipiemus ab eo

quoniam mandata eius custodimus

et ea quae sunt placita coram eo facimus

₂₃et hoc est mandatum eius

ut credamus in nomine Filii eius Iesu Christi

et diligamus alterutrum sicut dedit mandatum nobis

₂₄et qui servat mandata eius in illo manet et ipse in eo

et in hoc scimus quoniam manet in nobis

de Spiritu quem nobis dedit