EPISTULA IOHANNIS I 4

₁carissimi nolite omni spiritui credere

sed probate spiritus si ex Deo sint

quoniam multi pseudoprophetae exierunt in mundum

₂in hoc cognoscitur Spiritus Dei

omnis spiritus qui confitetur Iesum Christum in carne venisse

ex Deo est

₃et omnis spiritus qui solvit Iesum ex Deo non est

et hoc est antichristi

quod audistis quoniam venit

et nunc iam in mundo est

₄vos ex Deo estis filioli et vicistis eos

quoniam maior est qui in vobis est quam qui in mundo

₅ipsi de mundo sunt ideo de mundo loquuntur et mundus eos audit

₆nos ex Deo sumus

qui novit Deum audit nos qui non est ex Deo non audit nos

in hoc cognoscimus Spiritum veritatis et spiritum erroris

₇carissimi diligamus invicem

quoniam caritas ex Deo est

et omnis qui diligit ex Deo natus est et cognoscit Deum

₈qui non diligit non novit Deum quoniam Deus caritas est

₉in hoc apparuit caritas Dei in nobis

quoniam Filium suum unigenitum misit Deus in mundum

ut vivamus per eum

₁₀in hoc est caritas non quasi nos dilexerimus Deum

sed quoniam ipse dilexit nos

et misit Filium suum propitiationem pro peccatis nostris

₁₁carissimi si sic Deus dilexit nos

et nos debemus alterutrum diligere

₁₂Deum nemo vidit umquam

si diligamus invicem Deus in nobis manet

et caritas eius in nobis perfecta est

₁₃in hoc intellegimus

quoniam in eo manemus et ipse in nobis

quoniam de Spiritu suo dedit nobis

₁₄et nos vidimus et testificamur

quoniam Pater misit Filium salvatorem mundi

₁₅quisque confessus fuerit

quoniam Iesus est Filius Dei

Deus in eo manet et ipse in Deo

₁₆et nos cognovimus et credidimus caritati

quam habet Deus in nobis

Deus caritas est

et qui manet in caritate in Deo manet et Deus in eo

₁₇in hoc perfecta est caritas nobiscum

ut fiduciam habeamus in die iudicii

quia sicut ille est et nos sumus in hoc mundo

₁₈timor non est in caritate

sed perfecta caritas foras mittit timorem

quoniam timor poenam habet

qui autem timet non est perfectus in caritate

₁₉nos ergo diligamus

quoniam Deus prior dilexit nos

₂₀si quis dixerit quoniam diligo Deum

et fratrem suum oderit mendax est

qui enim non diligit fratrem suum quem vidit

Deum quem non vidit quomodo potest diligere

₂₁et hoc mandatum habemus ab eo

ut qui diligit Deum diligat et fratrem suum