EPISTULA PETRI I 3

₁similiter mulieres subditae suis

viris

ut et si qui non credunt verbo

per mulierum conversationem sine verbo lucri fiant

₂considerantes in timore castam conversationem vestram

₃quarum sit non extrinsecus capillaturae

aut circumdatio auri aut indumenti vestimentorum cultus

₄sed qui absconditus cordis est homo

in incorruptibilitate quieti et modesti spiritus

quod est in conspectu Dei locuples

₅sic enim aliquando et sanctae mulieres

sperantes in Deo

ornabant se subiectae propriis viris

₆sicut Sarra oboediebat Abrahae dominum eum vocans

cuius estis filiae benefacientes

et non timentes ullam perturbationem

₇viri similiter cohabitantes secundum scientiam

quasi infirmiori vaso muliebri

inpertientes honorem

tamquam et coheredibus gratiae vitae

uti ne inpediantur orationes vestrae

₈in fine autem omnes unianimes conpatientes

fraternitatis amatores misericordes humiles

₉non reddentes malum pro malo

vel maledictum pro maledicto

sed e contrario benedicentes

quia in hoc vocati estis ut benedictionem hereditate possideatis

₁₀qui enim vult vitam diligere et videre dies bonos

coerceat linguam suam a malo

et labia eius ne loquantur dolum

₁₁declinet autem a malo et faciat bonum

inquirat pacem et persequatur eam

₁₂quia oculi Domini super iustos

et aures eius in preces eorum

vultus autem Domini super facientes mala

₁₃et quis est qui vobis noceat

si boni aemulatores fueritis

₁₄sed et si quid patimini propter iustitiam beati

timorem autem eorum ne timueritis et non conturbemini

₁₅Dominum autem Christum sanctificate in cordibus vestris

parati semper ad satisfactionem

omni poscenti vos rationem de ea quae in vobis est spe

₁₆sed cum modestia et timore conscientiam habentes bonam

ut in eo quod detrahunt vobis confundantur

qui calumniantur vestram bonam in Christo conversationem

₁₇melius est enim benefacientes si velit voluntas Dei pati

quam malefacientes

₁₈quia et Christus semel pro peccatis mortuus est

iustus pro iniustis

ut nos offerret Deo

mortificatus carne vivificatus

autem spiritu

₁₉in quo et his qui in carcere erant spiritibus veniens praedicavit

₂₀qui increduli fuerant aliquando

quando expectabat Dei

patientia

in diebus Noe cum fabricaretur arca

in qua pauci id est octo animae salvae factae sunt per aquam

₂₁quod et vos nunc similis formae salvos facit

baptisma

non carnis depositio sordium

sed conscientiae bonae interrogatio in Deum

per resurrectionem Iesu Christi

₂₂qui est in dextera Dei

profectus in caelum

subiectis sibi angelis et potestatibus et virtutibus