EPISTULA IOHANNIS II 1

₁Senior electae dominae et natis eius quos ego diligo in veritate

et non ego solus sed et omnes qui cognoverunt veritatem

₂propter veritatem quae permanet in nobis

et nobiscum erit in aeternum

₃sit nobiscum gratia misericordia pax a Deo

Patre

et a Christo Iesu Filio Patris in veritate et caritate

₄gavisus sum valde

quoniam inveni de filiis tuis ambulantes in veritate

sicut mandatum accepimus a Patre

₅et nunc rogo te domina

non tamquam mandatum novum scribens tibi

sed quod habuimus ab initio ut diligamus alterutrum

₆et haec est caritas ut ambulemus secundum mandata eius

hoc mandatum est

ut quemadmodum audistis ab initio in eo ambuletis

₇quoniam multi seductores exierunt in mundum

qui non confitentur Iesum Christum venientem

in carne

hic est seductor et antichristus

₈videte vosmet ipsos ne perdatis quae operati estis

sed ut mercedem plenam accipiatis

₉omnis qui praecedit

et non manet in doctrina Christi

Deum non habet

qui permanet in doctrina

hic et Filium et Patrem habet

₁₀si quis venit ad vos et hanc doctrinam non adfert

nolite recipere eum in domum nec have ei dixeritis

₁₁qui enim dicit illi have

communicat operibus illius malignis

₁₂plura habens vobis scribere nolui per cartam et atramentum

spero enim me futurum apud vos et os ad os loqui

ut gaudium vestrum plenum sit

₁₃salutant te filii sororis tuae electae