EPISTULA IOHANNIS III 1

₁Senior Gaio carissimo quem ego diligo in veritate

₂carissime de omnibus orationem facio

prospere te ingredi et valere sicut prospere agit anima tua

₃gavisus sum valde

venientibus fratribus et testimonium perhibentibus veritati tuae

sicut tu in veritate ambulas

₄maiorem horum non habeo gratiam

quam ut audiam filios meos in veritate ambulantes

₅carissime fideliter facis quicquid operaris in fratres

et hoc in peregrinos

₆qui testimonium reddiderunt caritati tuae

in conspectu ecclesiae

quos bene facies deducens digne Deo

₇pro nomine enim profecti sunt

nihil accipientes a gentibus

₈nos ergo debemus suscipere huiusmodi

ut cooperatores simus veritatis

₉scripsissem forsitan ecclesiae

sed is qui amat primatum gerere in eis Diotrepes

non recipit nos

₁₀propter hoc si venero commoneam eius opera

quae facit verbis malignis garriens in nos

et quasi non ei ista sufficiant

nec ipse suscipit fratres

et eos qui cupiunt prohibet

et de ecclesia eicit

₁₁carissime noli imitari malum sed quod bonum est

qui benefacit ex Deo est

qui malefacit non vidit Deum

₁₂Demetrio testimonium redditur ab omnibus et ab ipsa veritate

et nos autem testimonium perhibemus

et nosti quoniam testimonium nostrum verum est

₁₃multa habui scribere tibi

sed nolui per atramentum et calamum scribere tibi

₁₄spero autem protinus te videre

et os ad os loquemur

₁₅pax tibi salutant te amici

saluta amicos per nomen