AD TIMOTHEUM II 4

₁testificor coram Deo et Christo Iesu

qui iudicaturus est vivos ac mortuos

et adventum ipsius et regnum eius

₂praedica verbum insta oportune inportune

argue obsecra increpa in omni patientia et doctrina

₃erit enim tempus cum sanam doctrinam non sustinebunt

sed ad sua desideria coacervabunt sibi magistros

prurientes auribus

₄et a veritate quidem auditum avertent

ad fabulas autem convertentur

₅tu vero vigila in omnibus labora opus fac evangelistae

ministerium tuum imple

₆ego enim iam delibor

et tempus meae resolutionis instat

₇bonum certamen certavi cursum consummavi fidem servavi

₈in reliquo reposita est mihi iustitiae corona

quam reddet mihi Dominus in illa die iustus iudex

non solum autem mihi

sed et his qui diligunt adventum eius

₉festina venire ad me cito

₁₀Demas enim me dereliquit diligens hoc saeculum

et abiit Thessalonicam

Crescens in Galliam

Titus in Dalmatiam

₁₁Lucas est mecum solus

Marcum adsume et adduc tecum

est enim mihi utilis in ministerium

₁₂Tychicum autem misi Ephesum

₁₃paenulam quam reliqui Troade apud Carpum veniens adfers

et libros maxime autem membranas

₁₄Alexander aerarius multa mala mihi ostendit

reddat ei Dominus secundum opera eius

₁₅quem et tu devita valde enim restitit verbis nostris

₁₆in prima mea defensione nemo mihi adfuit

sed omnes me dereliquerunt

non illis reputetur

₁₇Dominus autem mihi adstitit et confortavit me

ut per me praedicatio impleatur et audiant omnes gentes

et liberatus sum de ore leonis

₁₈liberabit me Dominus ab omni opere malo

et salvum faciet in regnum suum caeleste

cui gloria in saecula saeculorum amen

₁₉saluta Priscam et Aquilam et Onesifori domum

₂₀Erastus remansit Corinthi

Trophimum autem reliqui infirmum Mileti

₂₁festina ante hiemem venire

salutat te Eubulus

et Pudens et Linus et Claudia et fratres omnes

₂₂Dominus Iesus cum spiritu tuo

gratia nobiscum amen