LIBER GENESIS 11

₁erat autem terra labii unius et sermonum eorundem

₂cumque proficiscerentur de oriente

invenerunt campum in terra Sennaar et habitaverunt in eo

₃dixitque alter ad proximum suum

venite faciamus lateres et coquamus eos igni

habueruntque lateres pro saxis et bitumen pro cemento

₄et dixerunt venite faciamus nobis civitatem

et turrem cuius culmen pertingat ad caelum

et celebremus nomen nostrum

antequam dividamur in universas terras

₅descendit autem Dominus ut videret civitatem

et turrem quam aedificabant filii Adam

₆et dixit

ecce unus est populus et unum labium omnibus

coeperuntque hoc facere

nec desistent a cogitationibus suis donec eas opere conpleant

₇venite igitur descendamus et confundamus ibi linguam

eorum

ut non audiat unusquisque vocem proximi sui

₈atque ita divisit eos Dominus ex illo loco in universas terras

et cessaverunt aedificare civitatem

₉et idcirco vocatum est nomen eius Babel

quia ibi confusum est labium universae terrae

et inde dispersit eos Dominus super faciem cunctarum regionum

₁₀hae generationes Sem

Sem centum erat annorum quando genuit Arfaxad

biennio post diluvium

₁₁vixitque Sem postquam genuit Arfaxad quingentos annos

et genuit filios et filias

₁₂porro Arfaxad vixit triginta quinque annos et genuit Sale

₁₃vixitque Arfaxad postquam genuit Sale trecentis tribus annis

et genuit filios et filias

₁₄Sale quoque vixit triginta annis et genuit Eber

₁₅vixitque Sale postquam genuit Eber quadringentis tribus annis

et genuit filios et filias

₁₆vixit autem Eber triginta quattuor annis et genuit Faleg

₁₇et vixit Eber postquam genuit Faleg quadringentis triginta annis

et genuit filios et filias

₁₈vixit quoque Faleg triginta annis et genuit Reu

₁₉vixitque Faleg postquam genuit Reu ducentis novem annis

et genuit filios et filias

₂₀vixit autem Reu triginta duobus annis et genuit Sarug

₂₁vixitque Reu postquam genuit Sarug ducentis septem annis

et genuit filios et filias

₂₂vixit vero Sarug triginta annis et genuit Nahor

₂₃vixitque Sarug postquam genuit Nahor ducentos annos

et genuit filios et filias

₂₄vixit autem Nahor viginti novem annis et genuit Thare

₂₅vixitque Nahor postquam genuit Thare centum decem et novem annos

et genuit filios et filias

₂₆vixitque Thare septuaginta annis et genuit Abram et Nahor et Aran

₂₇hae sunt autem generationes Thare

Thare genuit Abram et Nahor et Aran

porro Aran genuit Loth

₂₈mortuusque est Aran ante Thare patrem suum

in terra nativitatis suae in Ur Chaldeorum

₂₉duxerunt autem Abram et Nahor uxores

nomen autem uxoris Abram Sarai

et nomen uxoris Nahor Melcha

filia Aran patris Melchae et patris Ieschae

₃₀erat autem Sarai sterilis nec habebat liberos

₃₁tulit itaque Thare Abram filium suum

et Loth filium Aran filium filii sui

et Sarai nurum suam uxorem Abram filii sui

et eduxit eos de Ur Chaldeorum

ut irent in terram Chanaan

veneruntque usque Haran et habitaverunt ibi

₃₂et facti sunt dies Thare ducentorum quinque annorum

et mortuus est in Haran