LIBER GENESIS 19

₁veneruntque duo angeli Sodomam vespere

sedente Loth in foribus civitatis

qui cum vidisset surrexit et ivit obviam eis

adoravitque pronus in terra

₂et dixit

obsecro domini declinate in domum pueri vestri

et manete ibi

lavate pedes vestros

et mane proficiscimini in viam vestram

qui dixerunt minime sed in platea manebimus

₃conpulit illos oppido ut deverterent ad eum

ingressisque domum illius fecit convivium

coxit azyma et comederunt

₄prius autem quam irent cubitum viri civitatis vallaverunt domum

a puero usque ad senem omnis populus simul

₅vocaveruntque Loth et dixerunt ei

ubi sunt viri qui introierunt ad te nocte

educ illos huc ut cognoscamus eos

₆egressus ad eos Loth post tergum adcludens

ostium ait

₇nolite quaeso fratres mei nolite malum hoc facere

₈habeo duas filias quae necdum cognoverunt virum

educam eas ad vos

et abutimini eis sicut placuerit vobis

dummodo viris istis nihil faciatis mali

quia ingressi sunt sub umbraculum tegminis mei

₉at illi dixerunt recede illuc

et rursus ingressus es inquiunt ut advena numquid ut iudices

te ergo ipsum magis quam hos adfligemus

vimque faciebant Loth vehementissime

iam prope erat ut refringerent fores

₁₀et ecce miserunt manum viri

et introduxerunt ad se Loth cluseruntque ostium

₁₁et eos qui erant foris percusserunt caecitate

a minimo usque ad maximum

ita ut ostium invenire non possent

₁₂dixerunt autem ad Loth

habes hic tuorum quempiam generum aut filios aut filias

omnes qui tui sunt educ de urbe hac

₁₃delebimus enim locum istum

eo quod increverit clamor eorum coram Domino

qui misit nos ut perdamus illos

₁₄egressus itaque Loth locutus est ad generos suos

qui accepturi erant filias eius et dixit surgite egredimini de loco isto

quia delebit Dominus civitatem hanc

et visus est eis quasi ludens loqui

₁₅cumque esset mane cogebant eum angeli dicentes

surge et tolle uxorem tuam et duas filias quas habes

ne et tu pariter pereas in scelere civitatis

₁₆dissimulante illo adprehenderunt manum eius

et manum uxoris ac duarum filiarum eius

eo quod parceret Dominus illi

₁₇et eduxerunt eum

posueruntque extra civitatem

ibi locutus est

ad eum

salva animam tuam noli respicere post tergum

nec stes in omni circa regione

sed in monte salvum te fac ne et tu simul pereas

₁₈dixitque Loth ad eos

quaeso Domine mi

₁₉quia invenit servus tuus gratiam coram te

et magnificasti misericordiam tuam quam fecisti mecum

ut salvares animam meam

nec possum in monte salvari

ne forte adprehendat me malum et moriar

₂₀est civitas haec iuxta ad quam possum fugere parva

et salvabor in ea

numquid non modica est

et vivet anima mea

₂₁dixitque ad eum ecce etiam in hoc suscepi preces tuas

ut non subvertam urbem pro qua locutus es

₂₂festina et salvare ibi

quia non potero facere quicquam donec ingrediaris illuc

idcirco vocatum est nomen urbis illius Segor

₂₃sol egressus est super terram et Loth ingressus est in

Segor

₂₄igitur Dominus pluit super Sodomam et Gomorram sulphur et ignem a

Domino de caelo

₂₅et subvertit civitates has et omnem circa regionem

universos habitatores urbium et cuncta terrae virentia

₂₆respiciensque uxor eius post se versa est in statuam salis

₂₇Abraham autem consurgens mane ubi steterat prius cum Domino

₂₈intuitus est Sodomam et Gomorram

et universam terram regionis illius

viditque ascendentem favillam de terra quasi fornacis fumum

₂₉cum enim subverteret Deus civitates regionis illius

recordatus est Abrahae

et liberavit Loth de subversione urbium in quibus

habitaverat

₃₀ascenditque Loth de Segor et mansit in monte

duae quoque filiae eius cum eo

timuerat enim manere in Segor

et mansit in spelunca ipse et duae filiae eius

₃₁dixitque maior ad minorem pater noster senex est

et nullus virorum remansit in terra

qui possit ingredi ad nos iuxta morem universae terrae

₃₂veni inebriemus eum vino dormiamusque cum eo

ut servare possimus ex patre nostro semen

₃₃dederunt itaque patri suo bibere vinum nocte illa

et ingressa est maior dormivitque cum patre

at ille non sensit nec quando accubuit filia nec quando surrexit

₃₄altera quoque die dixit maior ad minorem

ecce dormivi heri cum patre meo

demus ei bibere vinum etiam hac nocte

et dormies cum eo ut salvemus semen de patre nostro

₃₅dederunt et illa nocte patri vinum

ingressaque minor filia dormivit cum eo

et nec tunc quidem sensit

quando concubuerit vel quando illa surrexerit

₃₆conceperunt ergo duae filiae Loth de patre suo

₃₇peperitque maior filium et vocavit nomen eius Moab

ipse est pater Moabitarum usque in praesentem diem

₃₈minor quoque peperit filium

et vocavit nomen eius Ammon id est filius populi mei

ipse est pater Ammanitarum usque hodie